09 апреля 2010 г.
1989 çулхи февралĕн 15-мĕшĕнче Афганистанран юлашки совет салтакĕсем тухрĕç. Хĕрлĕçыр каччи Геннадий Николаевич Васильев кĕçĕн сержант та служба срокне татса таврăнчĕ, мирлĕ ĕçе пуçăнчĕ. Канашри педагогика училищин физкультура уйрăмне вĕренсе пĕтерчĕ. Мĕн паян кунчченех Шăхальти пĕтĕмĕшле пĕлÿ паракан тĕп шкулта физкультура учителĕ пулса ĕçлет. Ачасене физкультурăпа спорта юратма хăнăхтарнипе пĕрлех, сывă пурнăç йĕркине тытса пырассишĕн нумай тăрăшать. Районта ирттерекен кашни ăмăртăвах пысăк активлăхпа хутшăнать, яланах лайăх результатсем кăтартать.
Кăçалхи йĕлтĕр сезонĕ хупăнчĕ ĕнтĕ, Геннадий Николаевич миçе ăмăртăва хутшăнмарĕ-ши? Энĕшпуçĕнче пĕр тăван спорт мастерĕсене - Ивановсене, Çĕнĕ Кинчерте Рудольф Петров афганеца асăнса, РФ Патшалăх Думин депутачĕн П.Семеновăн тата районти «Хĕрлĕ ялав» хаçатăн призĕсене çĕнсе илессишĕн хутăш йĕлтĕр эстафетине хутшăнса хăйĕнпе пĕр çулхисен ушкăнĕнче ăмăртса кашнинчех пĕрремĕш вырăнсене çĕнсе илчĕ. Кашни ăмăртăвах шкул командине тăратнипе пĕрлех, Г.Васильев хăйĕн ырă тĕслĕхĕпе вĕренекенсене хавхалантарса пырать.