09 апреля 2010 г.
1941 çулхи сентябрь-октябрь уйăхĕсенче Чăваш Республикинче стрелоксен 324-мĕш дивизийĕ йĕркеленнĕ. Вăрмарсем ун шутĕнчи 1091-мĕш стрелковăй полкне шефа илнĕ. Унăн чи малтанхи командирĕ С.Родзивилко подполковник, комиссарĕ Джатиев аслă политрук пулнă. Пĕтĕм полк фронта кайма вирлĕн хатĕрленнĕ: занятисене кăнтăрла та, çĕрле те пĕр чарăнмасăр ирттернĕ.
... Декабрĕн 1-мĕшĕ тĕлне дивизи фронта çитнĕ те тепĕр пилĕк кунтан çапăçăва кĕнĕ. 1091-мĕш полк Люторичи ятлă ял патĕнче пĕрремĕш атакăна çĕкленнĕ. Çапла вара «Вăрмар полкĕ» (эпир ăна çапла чĕнме пултаратпăр, мĕншĕн тесен çав полкпа çыхăну питĕ тачă пулнă), çапăçусене хутшăннă. Люторичи ял Богородицк хули патĕнчех вырнаçнă. (Рязань облаçĕ). Малтанхи çапăçусем питĕ йывăр пулнă. Икĕ батальона кăна хĕç-пăшаллантарнă, виççĕмĕшĕ минометчиксен батальонĕ хĕç-пăшалсăрах пĕр кана фронтра иккĕмĕш эшелонра тăнă. Кайран, 2-3 эрнерен, пĕтĕм полк кирлĕ хĕç-пăшал илнĕ. Пирĕн «Вăрмар полкĕн» çулĕ çапла пулнă: Люторичи, малалла çак, хуласем - Богородицк, Белев, Козельск, Сухиничи, Киров, Хотимск, Славгород, Быков, Минск, Гродно, Осовец, Кенигсберг... Жизура хули çывăхĕнче тата юхан шыв патĕнче тăнă чухне дивизире чăваш ĕççыннисен делегацийĕ хăнара пулнă. Вăл полк валли хаклă парнесем илсе килнĕ. Фронта чăваш делегацийĕ пырса курни питĕ пысăк савăнăç пулнă. Кайран дивизирен Чăваш Республикине килсе курнă.
...Уйрăммăнах 1091-мĕш полк Осовец хулипе крепоçшăн паттăррăн çапăçнă. Уншăн полка «Осовецкий» хисеплĕ ята панă. Вăрмарсем фронта посылкăсем нумай янă.