02 апреля 2010 г.
ЧР Президенчĕ Н.Федоров республикăри халăхăн пурнăçĕпе сывлăхĕн пахалăхне тата обществăлла инфратытăмне лайăхлатас тĕллевпе ятарласа тĕллевлĕ программа йышăннăччĕ. Çак программăпа килĕшÿллĕн чылайăшĕ харпăр хăй килĕсене те ĕçмелли шывпа тивĕçтерме пултарчĕç. Пысăк Енккасси ял тăрăхне кĕрекен Саруй ялĕнче пурăнакансем пирки вара çакна калаймăн. Ку ялта шыв нуши 2007 çултанпах пырать. Иртнĕ çул шыв ыйтăвĕпе тарăхса район хаçатĕнче мартăн 18-мĕшĕнчи 27-мĕш номерĕнче пичетленнĕ «Пулă евĕр тунсăхлаççĕ тăрă шывшăн Саруйсем», тепри çак çулхи майăн 20-мĕшĕнче 50-мĕш номерте пичетленнĕ «Шыв нуши тек ан пултăр» статьясем пичетленсе тухнăччĕ. Çак материалсенче Саруйĕнчи Школьная, Садовая, Советская урамсенче пурăнакансем шывсăр тертленни çинчен тарăхса çырнăччĕ. Вĕсен тарăхăвне те ăнланмалла ĕнтĕ, шывсăр пĕр чĕрĕ чун та пурăнаймасть, ку вара Саруйсемшĕн те çавах. Ку ялта малтанхи вăхăтра икĕ шыв башни пулнă. Пĕри тахçанах юрăхсăра тухнă пулнă. Ферма çывăхĕнчине Н.Тимофеев ялти хресчен (фермер) хăй вăйĕпе юсаса ĕçе кĕртнĕ пулнă. Шыв башни 2007 çулхи ноябрĕн 14-мĕшĕнчи договорпа килĕшÿллĕн Н.Тимофеев хуçалăхĕ çинчи пурлăх шутланать. Апла пулин те ял тăрăхĕн администрацийĕ йĕркелесе тăнипе ăна ял халăхĕн укçипе тÿлесе, тытса тăнă. Кăçалхи март уйăхĕнчен пуçласа вара ăна ĕçлеттернĕшĕн электроэнерги укçине Н.Тимофеев хăй тÿлесе тăма тытăнать. Шыв башни ахаль те çĕнех маррине кура, ăна тăтăшах юсаса тăмалла. Апла пулсан шывпа усă курнăшăн халăхăн вăхăтра укçине тÿлемелли паллă. Пысăк Енккасси ял тăрăхĕн администрацийĕпе Н.Тимофеев фермер халăха çителĕклĕ таран шывпа тивĕçтермелли пирки калаçса татăлнă. Шывшăн тÿлемелли укçине район депутачĕсен Пухăвĕн депутачĕсем йышăнса çирĕплетнĕ тарифсем тăрăх йĕркеленĕ. Çапла вара ялта пурăнакан кашни çыннăн, шывпа çителĕклĕ усă курас тесен, малашне Н.Тимофеевпа икĕ енлĕ договор çырма тивет. Ун хыççăн тин çÿлте асăннă урамсенче шывлă пулĕç.