30 марта 2010 г.
«Хĕрлĕ ялав» хаçат редакцийĕнче «Манăн пулас професси» темăпа районти шкулсенче вĕренекенсемпе иртнĕ çавра сĕтеле райадминистрацин вĕрентÿ тата çамрăксен политикин пайĕн тĕп специалисчĕ Н.Иванова, райадминистрацин ял хуçалăхĕпе экологи тата çĕрпе пурлăх пайĕн тĕп специалист-зоотехникĕ О.Васильев, райпо канашĕн председателĕ К.Никитин, райпон кадрсем енĕпе ĕçлекен заместителĕ Н.Семенова, районти ĕçпе тивĕçтерекен центрăн тĕп специалисчĕ Л.Мишина хутшăннă.
Ку мероприятие Вăрмарти Г.Е.Егоров ячĕллĕ пĕрремĕш, Аслă Чак, Пысăк Енккассинчи, Кивĕ Вăрмарти, Чупайĕнчи тата ытти шкулсенчен вĕренекенсем йышлăн хутшăнчĕç. Чи малтанах райадминистрацин вĕрентÿпе çамрăксен политикин пайĕн тĕп специалисчĕ Н.Иванова сăмах илчĕ. Надежда Васильевна Патшалăхăн пĕрлехи экзаменĕн хăш-пĕр çĕнĕлĕхĕсемпе паллаштарчĕ, вĕренекенсен ыйтăвĕсем çине хуравларĕ.
2008-2009 çулхи вĕренÿ çулĕнче пĕтĕмĕшле пĕлÿ паракан вăтам шкулсенчен 208 ача вĕренсе тухнă пулсан, кăçалхи вĕренÿ çулĕнче вара вĕсен йышĕ - 138. Иртнĕ çул аслă вĕренÿ заведенийĕсене пурĕ 138 ача пĕлÿ пухма кĕнĕ, çав шутран 55-шĕ Раççей шайĕнчи аслă вĕренÿ заведенийĕсене. Çулран çул ачасен йышĕ чакса пыни пăшăрхантарать паллах. Иртнĕ вĕренÿ çулĕнче 4 ачана аслă вĕренÿ заведенине пĕлÿ пухма кĕме направлени панă. Райадминистрацин ял хуçалăхĕпе экологи тата çĕрпе пурлăх пайĕн тĕп специалист-зоотехникĕ О.Васильев çамрăксене вĕренсе тухса специальность илсен, ялта тĕпленсе пурăнма каларĕ. Ял хуçалăхĕпе çыхăннă профессисене суйласа илме сĕнчĕ. Ку енĕпе Шупашкарти ял хуçалăх академипе тачă çыхăнура ĕçленине палăртрĕ. Çамрăк специалистсене ялта тĕпленсе пурăнмашкăн патшалăхăн тĕрлĕ программисем ĕçлеççĕ. Çурт-йĕр çавăрма, кил хуçалăхне аталантарма çăмăллăхлă кредит параççĕ. Вĕренсе пĕтерсе алла диплом илсен яш-кĕрĕмпе хĕр-упраç яла таврăнса çак çăмăллăхсемпе усă курасса шанас килет. Юлашки вăхăтра ял хуçалăхне аталантарассине пысăк тимлĕх уйăраççĕ. Çавна май тĕрлĕ инвестицисем хываççĕ. «Акă «Вăтам Энĕш» хуçалăх 200 пуç ĕне вырнаçмалăх вите хăпартма палăртать. «Урмарская» ăратлă кайăк-кĕшĕк фабрики кайăк-кĕшĕк ытларах ĕрчетме витесем тăвас тĕллевлĕ. «Арабоси» агрофирма тĕш-тырăна упрамашкăн хранилищĕсем тăвать. Вĕсенче тăрăшса вăй хума çĕнĕ ĕç вырăнĕсем йĕркелеççĕ. Çавна май çамрăк специалистсем валли те ĕç вырăнĕсем пулаççĕ», - терĕ Олег Германович вĕренекенсен ыйтăвĕсем çине хуравланă май. Районти ĕçпе тивĕçтерекен центрăн тĕп специалисчĕ Л.Мишина палăртнă тăрăх, кунта пурĕ 135 тĕрлĕ профессипе пĕлÿ пухма пулать. Вĕреннĕшĕн тата общежитире пурăннăшăн укçа тÿлемелле мар, унсăр пуçне çул укçине пĕр хутчен районти ĕçпе тивĕçтерекен центр тÿлет. Рынок экономикинче чи кирлĕ профессисем: парикмахер, повар-кондитер, официант, бармен шутланаççĕ. Республикăри тĕллевлĕ программăпа килĕшÿллĕн иртнĕ çул 279 граждана ĕçпе тивĕçтернĕ, 60 çынна вĕренме янă. Кăçал планпа ĕçпе тивĕçтерекен центрта тăракан 90 çынна вĕренме ямалла пулсан, 45 граждан пĕлÿ пухма кайнă. Ĕçпе тивĕçтерекен центра 16 çул тултарнă граждан учета тăма пултарать. Унтан сăмах райпо канашĕн председателĕ К.Никитин илчĕ. Константин Владимирович райпо системинче ĕçлемешкĕн Шупашкарти коопераци институтĕнче е техникумĕнче пĕлÿ пухнă специалист кирлине палăртрĕ. Асăннă вĕренÿ заведенийĕсене пĕтернисем ĕçсĕр юлманнине каларĕ вăл.
«Пахалăхлă пĕлÿ илес тесен пурлăхпа техника бази çирĕп никĕсленнĕ аслă вĕренÿ заведенийĕсене вĕренме кĕме тăрăшмалла. Шупашкарти коопераци институчĕ шăпах вĕсенчен пĕри», - терĕ К.Никитин вĕренекенсемпе тĕл пулнă май.Çавăн пекех Константин Владимирович шкулсенче вĕренекенсен ыйтăвĕсем çине те тулли хуравсем пачĕ.
Пĕтĕмĕшле каласан, редакци тĕпелĕнче иртнĕ мероприяти пурне те килĕшрĕ. Вĕренекенсем хăйсене валли пуян информаци илчĕç, хăшĕ-пĕри пулас профессипе тĕплĕнрех те паллашрĕ.