26 марта 2010 г.
Николай Васильевич Самсонов Çиçтĕпе ялĕнче çуралса ÿснĕ, Кавалти вăтам шкулта вĕреннĕ. Хусанта вăрçăччен аслă шкул пĕтерсен Свердловскри пĕр пысăк заводра инженер пулса ĕçленĕ... Паллă совет писателĕ Э.Казакевич хăйĕн «Весна на Одере» произведенийĕнче те Самсонов ентешĕн ятне асăнать. Мĕн пирки-ха; Николай Васильевич рейхстага Совет çарĕсем илсен унăн пĕрремĕш дежурнăй коменданчĕ пулнă.
Утса тухнă çулсен юлашки тапхăрĕ çинчен Николай Васильевич кĕскен кăна акă мĕн пĕлтернĕ: «...Пирĕн 756-мĕш полк Кунесдорфа пысăк çухатусем тÿссе, штурмласа илчĕ. Берлина çитме тепĕр 40 километр юлчĕ. Апрелĕн 21-мĕшĕнче полк çурçĕр енчен Германин тĕп хулин хĕррине тухрĕ. Апрелĕн 28-мĕшĕнче Моабит тĕрми патне çитнĕ...
Апрелĕн 30-мĕшĕнче, артиллери вăйлăн персе тăнă хыççăн, салтаксем каллех - миçемĕш хут ĕнтĕ - рейхстага штурмлама атакăна çĕкленеççĕ.
Пурте пĕрле - хăвăрттăн штурмламалли самант çитет. Çитес çĕре çитме - виççĕр метр, анчах çав хушăрах мĕн чухлĕ чăрмав, мĕн чухлĕ хăрушлăх, вилĕм хăрушлăхĕ. Акă тинех тĕп алăксем умĕнчи гранит пусма.
Рейхстагри çапăçу вăрахчен пычĕ, питех те хаяр пулчĕ. Рейхстага тăшманран, тĕпрен илсен, апрелĕн 30-мĕшĕнче 22 сехет тĕлне тасатса пĕтернĕ.
1945 çулхи апрелĕн 30-мĕшĕнче 15 сехетре рейхстаг коменданчĕ пулма С.Неустроев капитана, 22 сехетре - 756-мĕш полк командирне Зинченко полковника уйăрса лартнă. Рейхстагăн пĕрремĕш дежурнăй коменданчĕ вара çак йĕркесене çыраканĕ пулнă». Çапла вара, сăпайлă чăваш ывăлĕпе, хамăр ентешĕмĕрпе, Николай Васильевич Самсоновпа, чăннипех те мухтанма тивĕçлĕ эпир, Вăрмарсем.