26 марта 2010 г.
1936 çулта Мускав Кремлĕн коменданчĕн приказĕпе Арсеналта вырнаçнă уйрăм батальонран ятарлă Полк туса хунă. Çавăнтан пуçланнă та ĕнтĕ хальхи чаçĕн историйĕ. Президент полкĕ - элита чаçĕ. Вăл Мускав Кремлĕн объекчĕсене - Раççей Федерацийĕн Президенчĕн официаллă резиденцине, çавăн пекех патшалăхăн кирлĕ ытти объекчĕсене сыхлас енĕпе çар заданийĕсене пурнăçлать. Патшалăхăн çÿллĕ шайра пурнăçлакан протоколлă мероприятийĕсен лăпкăлăхне йĕркелет. Кремль стени умĕнче хисеплĕ караул, Паллă мар салтакăн вил тăпри çинчи ĕмĕр сÿнми çулăм çуннă çĕрте службăра тăнă çĕре хутшăнать. Президент полкĕнче Раççей Федерацийĕн 43 субъектĕнчен хĕсмете тăраççĕ. Президент полкне чăваш каччисене виççĕмĕш çул ăсатаççĕ.
Кăвак пакунлисен ретне тăма требовани питех те çирĕп:
- кĕлетке 175 сантиметртан пуçласа 190 сантиметр çÿллĕш пулмалла;
- куç çивĕч курмалла, тĕссене лайăх уйăрмалла;
- призывникăн тулли çемьере пурăнмалла;
- вăтам пĕлÿ илмелле тата ытти те.
Енчен те çамрăкăн çывăх тăванĕсем е хăй преступлени тунă пулсан тата психоневрологи, наркологи, ÿтпе венерологи диспансерĕнче шутра тăрсан Кремле хураллама илмеççĕ. Вăрмар поселокĕнчи Александр Лисицын çак требованисене пур енчен те туллин тивĕçтерет.
«Тăван çĕршыва хÿтĕлесси - кашни каччăн тивĕçĕ. Салтак пăттине пурин те тутанмалла. Салтак аттине кашнин тăхăнмалла. Унсăрăн коллективра, тус-юлташсем хушшинче чыс-хисепе çĕнсе илеймĕн», - çак шухăш çамрăк каччăн - Александр Лисицынăн - пуçĕнче малтанах тĕвĕленнĕ. Çар пуçĕсем çинчен çырнă кĕнекесем сахал мар вуланă, салтаксен паттăрлăхĕнчен чăннипех те тĕлĕннĕ. Çавсем ĕнтĕ унăн чĕринче ырă йĕр хăварнă, вĕсем пек пулма хистенĕ. Ахальтен мар Вăрмарти Г.Е.Егоров ячĕллĕ пĕрремĕш вăтам шкулта вĕреннĕ чухнех чăн-чăн салтак пулма хатĕрленнĕ. Шкулта тăрăшса вĕреннĕ, спортпа туслă пулнă. Çакă ăна çирĕп сывлăхлă çитĕнме пулăшнă.
- 1 метр та 84 сантиметр çÿллĕш çитĕннĕ яштака каччă спорта чунтан парăннă. Шкулта вĕреннĕ чухнех баскетболла, футболла выляма, самбо енĕпе кĕрешме юрататчĕ. Ыттисемшĕн тĕслĕх пулса тăратчĕ, - тулли кăмăлпа каласа парать шкулти ОБЖ учителĕ Владимир Павлович Антонов.
Унăн пархатарлă ĕмĕчĕ пурнăçланчĕ. Иртнĕ çул вăл, Мускаври гуманитарипе экономика институчĕн Шупашкарти филиалĕн пĕрремĕш курсĕнче вĕренекенскер, хăй ирĕкĕпе çар ретне тăчĕ. Туслă та тулли çемьере çитĕннĕ вăл. Ашшĕ, Олег Александрович Лисицын, ĕçлеме Мускава çÿрет. Амăшĕ, Зинаида Ивановна, район больницинче вăй хурать. Рома пиччĕшĕ Мускаври гуманитарипе экономика институчĕн Шупашкарти филиалĕнче тăваттăмĕш курсра вĕренет.
- Иртнĕ çулхи ноябрĕн 12-мĕшĕнче республикăри сбор пунктĕнчен 15 çамрăка, вĕсен шутĕнче пирĕн Саша та пур, Президент полкне службăна ăсатрăмăр. Малтанах вĕсем Мускав облаçĕнче пĕр уйăх хушши çар ĕçне вĕренчĕç. Декабрĕн 5-мĕшĕнче присяга тытрĕç. Ку савăнăçлă мероприятие çемйипех кайса килтĕмĕр. Эпир те ывăла службăна йĕркеллĕ ирттерме ырлăх-сывлăх сунтăмăр. Присяга хыççăн вĕсене уйăрчĕç. Пĕрисем Паллă мар салтакăн вил тăприне сыхлĕç, теприсем стройпа утĕç, пирĕн Саша вара пĕрремĕш ротăна - «квадрата» - лекрĕ, - хăйĕн савăнçне пытармасăр пĕлтерет салтакăн амăшĕ Зинаида Ивановна Лисицына.
Кремльте те хĕсметре тăракансене килсе курма та юрать иккен. Хăна пÿлĕмĕ Никольски башнинче вырнаçнă. Вăл канмалли тата уяв кунĕсенче ĕçлет.
Мал ĕмĕтлĕ çамрăк хăйĕн пурнăçне çар ĕçĕпе çыхăнтарма тĕллев лартнă. Служба срокне татсан вăл кунтах контракт йĕркипе юлма шутлать е аслă çар училищине вĕренме кĕресшĕн. Апла пулсан, эпир ĕмĕтленнине пурнăçа кĕртме ăнăçу сунатпăр.