26 марта 2010 г.
«Вăрçă асаппа инкек акать», - тенĕ ваттисем. Кирек мĕнле вăрçă та куççульсĕр, çухатусăр пулмасть. Кивĕ Вăрмар ялĕнчен 357 çын вăрçа тухса кайнă, вĕсен шутĕнче 19 хĕрарăм. Вăрçăран 107 ентеш çеç каялла таврăннă. Çапăçу хирĕнчи салтаксемпе тан тыл ĕçченĕсем те хамăр çĕршыв ирĕкĕшĕн тăрăшнă. Сахал мар терт-нушине курнă вĕсем, тылра ырми-канми ĕçленĕ. Темле йывăр пулсан та, пуçĕсене усман, тÿснĕ, чăтнă.
Çак кунсенче Кивĕ Вăрмар ял тăрăхĕнче вăрçăпа тыл ветеранĕсене Аслă вăрçăра çĕнтернĕренпе 65 çул çитнĕ ятпа кăларнă медальсене сумлăн пама пуçланă тапхăр пырать. Нумаях пулмасть ял тăрăхĕн администраци çуртĕнче тата ялти библиотекăра Виçпÿрт, Туçи тата Çĕнкаспа Ешкипе кассисенче пурăнакан хисеплĕ тыл ĕçченĕсене медальсем парса чысларĕç. Кунта Çĕнтерĕве çывхартнă çынсем йышлăн пуçтарăнчĕç.
Савăнăçлă ларусенче ял тăрăхĕн пуçлăхĕ Г.Эверсков ветерансене малтанах РФ Президенчĕн Д.Медведевăн юбилей çинчен калакан Указпа паллаштарчĕ, унтан Аслă Çĕнтерÿ 65 çут тултарнă ятпа чĕререн саламларĕ. Çĕршыв ирĕклĕхне çăлса хăварнă паттăрсене канлĕ ватлăх, вăрăм кун-çул, çирĕп сывлăх сунчĕ. Ватăсене чыслама район администрацийĕнчен ятарласа Л.Петрова килнĕ. Вăл та вăрçă кунĕсене паттăррăн чăтса ирттернисене ăшă сăмахсем каларĕ. Вĕсене юбилей медалĕ илнĕ ятпа çемьере кил ăшши, ачасемпе мăнуксен хисепĕпе юратăвне курма сунчĕ. Пире тăван кĕтесре ирĕклĕ пурăнма, сар хĕвел айĕнче тус-тăванпа савăнма май туса панăшăн тав турĕ.
Хисеплĕ ватăсене ялти вăтам шкулти ачасем хăйсен юрри-ташшисемпе савăнтарчĕç.
Çак савăнăçлă ларура ветерансем хăйсен йывăр пурнăçĕсене аса илчĕç. Чылайччен калаçса ларчĕç. Хăши-пĕрисен вăрçăран таврăнман тăванĕсем те пур-çке. И.Петрова, А.Владимирова, Ю.Эверскова тата ыттисем те вăрçăн йывăр кунĕсене куççуль витĕр аса илчĕç. Çапах та тыл ветеранĕ Юлия Алексеевна «Катюша» юрăпа пухăннисене савăнтарма вăй çитерчĕ.
Сумлă юбилейпе паракан медальсене тивĕçлисене пурне те парса пĕтереймен-ха Кивĕ Вăрмарта. Çитес кунсенчех ялти шкулта чаплă лару-тăрура ветерансен тепĕр ушкăнне медальсемпе наградăласа саламлĕç. Тухса çÿреймен ветерансене ял тăрăхĕн яваплă çыннисем килĕрен кайса чыслăç.