26 марта 2010 г.
Хальхи вăхăтра пирĕн çар чаçĕсем ытларах контракт йĕрки çине куçса пыраççĕ. Çавна май пур çĕрте те контракт мелĕпе службăна ярассине пысăк тимлĕх уйăраççĕ.
Чăваш Республикин çар ĕç комиссариачĕн Вăрмар тата Куславкка районĕсенчи уйрăмĕнчен çар службинче пулнă, аслă пĕлÿ илмен 19-35 çулхи арçынсем Рязаньти вĕрентÿ центрĕнче профессиллĕ ятарлă пĕлÿ илме пултараççĕ. Центрта сержантсене вĕрентсе хатĕрлеççĕ. Вĕренме кĕрес текенсен чи малтан çирĕп сывлăхлă, вăтам е ятарлă вăтам пĕлÿллĕ тата çар службинче пулмалла. Судпа айăпланнисене илмеççĕ. Контракт майĕпе службăра пулнисем те кунта вĕренме кĕме пултараççĕ. Вĕренме конкурс мелĕпе илеççĕ. Çар чаçĕсенчен ятарласа вĕренме кĕме тесе рекомендаци илнисене, хĕрÿ вырăнсене хутшăннă ветерансемпе участниксене конкурссăр вĕренме илеççĕ. 2 çул та 10 уйăх вĕренмелле. Кунта çар чаçĕсенче ĕçлеме кирлĕ профессисене хатĕрлеççĕ. Вĕренсе пĕтерсен сержантсене патшалăх дипломне параççĕ (техникум вĕренсе пĕтернĕ пек пулать). Курсантсем общежитинче пурăнаççĕ, тÿлевсĕр 3 хут апатланаççĕ,10-20 пин тенкĕ стипенди илеççĕ, тĕрĕсрех каласан, ăна илесси мĕнле вĕреннинчен килет. Вĕренсе тухсан чи сахалтан та 35 пин тенкĕ укçа параççĕ. Çак суммăна контракт çинче палăртаççĕ. Вĕреннĕ вăхăтра çуллахи каникул 30 талăк, хĕллехи 15 талăк пулать.
Унсăр пуçне контракт енĕпе тĕрлĕ çар чаçĕсене службăна кайма пулать. Хальхи вăхăтра вара Çурçĕр Кавказ çар округĕнчи мотострелоксен 8-мĕш уйрăм (сăрт-ту) бригадине (Борзой хули); Ханкала, Калиновская станицинчи гарнизонĕсенчи мотострелоксен 18-мĕш уйрăм бригадине; Шали гарнизонĕнчи çар хулинчи мотострелоксен 17-мĕш бригадине кайма май пур. Çаксем пурте Чечен Республикинче вырнаçнă. Çар çыннисем общежитисенче пурăнаççĕ, тÿлевсĕр апатланаççĕ. Ĕç укçи 25 пин пин тенкĕ таран пулать. Пенсие тухнă чухне ĕç стажне пĕр уйăх службăра пулнине уйăх çурăпа танлаштарса шутлаççĕ. Çакă вара хальхи вăхăтра ĕç вырăнĕ тупайман çамрăксемшĕн те, ĕçлесе укçа тупас тĕллевпе унта-кунта кайса çÿрекенсемшĕн те питех те меллĕ.
Контрактпа Чечен Республикине каяс кăмăллисен тата Рязанти вĕрентÿ центрне вĕренме кĕрес текенсен тĕплĕнрех Чăваш Республикинчи çар ĕç комиссариачĕн Вăрмар тата Куславкка районĕсенчи уйрăмне килсе е 2-11-09, 2-13-64, 2-15-70 номерлĕ телефонсемпе шăнкăравласа ыйтса пĕлме пулать.