26 марта 2010 г.
Календарь вăхăчĕпе çăварни маларах иртсе кайнă пулсан та, хĕлпе сыв пуллашас йăлана асран ямарĕç Мăнçырмасем. Пĕр-пĕринпе тĕл пулса калаçни, сывлăхĕпе интересленни, районта, республикăра пулса иртекен çĕнĕ хыпарсене сÿтсе явни пурнăç çине урăхларах пăхма хистет, вăй-хал хушать.
Çăварни кашни çулах Хĕрарăмсен пĕтĕм тĕнчери уявĕпе тÿр килет, çавна пулах-и, тен, ял тăрăхĕн администрацийĕ умне арçынсемпе пĕрле хĕрарăмсем те йышлă пухăннă. Ватти-вĕттине, ĕçлекен çын е тивĕçлĕ канурине пăхмасăр комисси йĕркеленĕ спорт ăмăртăвĕсене хутшăнма кашниех хатĕр. Спорт вăййисене ирттерме суйланă комисси членĕсем, юри тенĕ пекех, хĕрарăмсем валли ăмăртма ытларах чухне арçын тăвакан ĕçсене палăртнă.
Çăварни илемĕ - тем тĕрлĕ те илемлетсе пĕтернĕ лашасемпе ял йĕри-тавра çаврăнни. Лаша хуçисене хавхалантарас тĕллевпе «Павлов В.Ф» хресчен (фермер) хуçалăхĕ кашнинех 2-шер михĕ тырă уйăрса панă.
Алă вăйĕ виçессипе, пăта çапса кĕртессипе, вутă çурас ăсталăха кăтартассипе ăмăртрĕç пирĕн маттур хĕрарăмсем. Ушкăн вăйне танлаштарса пăхас тесе канат та туртса пăхрĕç. Вăй питти хĕрарăмсемпе пĕрле аслă ăрури çынсем те кăмăлтанах хутшăнчĕç. Уйрăмах А.Семенова, Н.Филиппова, Р.Дмитриева хастар пулнине палăртма кăмăллă. Пĕр спорт вăййине те хутшăнмасăр юлмарĕç вĕсем.
Çĕнтерÿçĕсене пурне те «тулли конверт» парса хавхалантарчĕç. Ку енĕпе спонсор пулса Мăнçырма ял тăрăхĕн администрацийĕ, А.Белов, И.Иванова предпринимательсем пулăшнă.
Вăхăта усăллă ирттерме, культурăллă канма пĕлекен çын ĕçре те хастар, малта пулнине лайăх пĕлет вырăнти коллективлă фермер хуçалăхĕн ертÿçи В.Павлов.
Нимĕнле уяв та юрă-ташăсăр иртмест. Вячеслав Федорович пуçарăвĕпе, вăл пулăшу панипе Шупашкартан килнĕ артистсем ял халăхне нумайччен хăйсен пултарулăхĕпе савăнтарчĕç.