26 марта 2010 г.
Мартăн 24-мĕшĕнче Мускавра Чăваш Ен Президенчĕ Н.Федоров Раççей Федерацийĕн Правительствин Председателĕн пĕрремĕш çумĕпе В.Зубковпа тĕл пулнă, республикăн агропромышленноç комплексне аталантарас тĕлĕшпе тăракан çивĕч ыйтусене сÿтсе явнă.
Раççей Правительствин пĕрремĕш вице-премьерĕ Чăваш Ен ертÿçи Етĕрнепе Сĕнтĕрвăрринчи спиртзаводсене пулăшасси çинчен хатĕрленĕ сĕнÿсене ырланă, çийĕнчех ирттернĕ ĕçлĕ канашлура федераци тытăмĕнчи предприятисене вăраха ямасăр пулăшас пирки тивĕçлĕ хушусем панă.
Мускавра Н.Федоров çавăн пекех Раççей Федерацийĕн Шутлав палатин ертÿçипе С.Степашинпа курнăçнă, республикăн социаллă пурнăçĕпе экономика аталанăвĕпе çыхăннă ыйтусене тишкернĕ. Çав шутра - федерацин Чăваш Республикинчи тытăмĕсен федераци харпăрлăхĕпе усă курас ĕçри витĕмлĕхне ÿстересси те.