23 марта 2010 г.
Халĕ кашни шкултах сывă пурнăç йĕркине тытса пырас тĕлĕшпе тĕрлĕрен спорт мероприятийĕсем тăтăшах йĕркелеççĕ, вĕренекенсен спортри ăсталăхне ÿстерсех пыраççĕ.
Ку енĕпе Чупайĕнчи тата Энĕшпуçĕнчи шкулсене уйрăмах палăртмалла. Вĕсен спортсменĕсем ĕнтĕ районта ирттерекен ăмăртусенче яланах малти вырăнсене йышăнаççĕ. Ытти шкулсенче те лайăх улшăнусем палăраççĕ. Акă тĕслĕхрен, Тикаш шкулĕнчи физкультура учительне О.Мефодьевах илер.
- Олег Геннадьевич Мефодьев ĕçлеме пуçласан шкулта физкультурăпа спорт ĕçĕ палăрмаллах лайăхланчĕ. Хăйĕн ĕçне чунтан парăннă преподаватель спорт ăмăртăвĕсем час-часах ирттерет, вĕренекенсен спортри ăсталăхне куллен туптаса пыма тăрăшать. Кăçал чи пысăк категориллĕ учитель ятне тивĕçрĕ, - тулли кăмăлпа каласа парать Тикашри пĕтĕмĕшле пĕлÿ паракан тĕп шкул директорĕ Н.Иванов.
Тăрăшни сая каймасть. Çакна «Хĕрлĕ ялав» хаçат призĕсене çĕнсе илессишĕн ирттернĕ хутăш йĕлтĕр эстафети те лайăх çирĕплетсе пачĕ.
Пĕрремĕш ушкăнра пиллĕкмĕшпе çиччĕмĕш классенче вĕренекен икĕ арçын ача тата икĕ хĕр ача 1 километр чупрĕç. Çивĕч кĕрешÿре Энĕшпуç шкулĕн команди пĕрремĕш вырăн йышăнчĕ. Вĕсене кăшт выляса ярса иккĕмĕшне Тикашсем тухрĕç. Шкул чысне пĕр тăван Алинăпа Николай Ленскийсем, Алина Иванова, Дмитрий Васильев пултаруллăн хÿтĕлерĕç .
Иккĕмĕш ушкăнра та малти вырăншăн хĕрÿ кĕрешÿ пычĕ. Спортсменсем икĕ километра чупса ăмăртрĕç. Шкулти Анна Ленская, Галина Иванова, Николай Шапеев, Владимир Гаврилов хăйсен мĕн пур тăрăшулăхне пачĕç. Чупайĕнчи пĕрремĕшпе иккĕмĕш командисем хыççăн виççĕмĕш вырăн йышăнчĕç.
Çапла вара Тикаш шкулĕн команди призлă вырăнсене çĕнсе илсе Дипломсемпе укçан парнесене тивĕçрĕ.
х х х
А.ИВАНОВА. «Çамрăксем сывă пурнăç йĕркишĕн!» акци вăхăтĕнче пирĕн шкулта тĕрлĕ мероприятисем ирттереççĕ. Шкул ачисен сывлăхне çирĕплетес тесе О.Мефодьев физкультура учителĕ те нумай ĕçлет. Биатлон эстафети вара - чи юратнă спорт ăмăртăвĕ пирĕн. Ăмăрту икĕ тапхăрпа иртрĕ. Пĕринче 5-7 класс ушкăнĕсем пулчĕç, тепринче - 5, 8, 9 класс ушкăнĕсем. Пиллĕкмĕш класс ачисем икĕ тапхăра хутшăнса чи лайăх результатсем кăтартрĕç. «Шкул пуласлăхĕсем», - пăшăлтатрĕç пăхса тăракансем. Тăххăрмĕшсемпе çиччĕмĕшсем те аван чупрĕç. Вĕсем иккĕмĕш вырăн йышăнчĕç.