23 марта 2010 г.
ЧР Президенчĕн «Чăваш Республикинче ялсенчи культура учрежденийĕсене аталантармалли мерăсем çинчен» Указа пурнăçласа районти хăш-пĕр культура учрежденийĕсене модернизацилес ĕç анлă пычĕ.
Эпир те, Кĕтеснерти Культура çуртĕнче тăрăшса вăй хуракансем, çак ĕçе пĕчĕккĕн пурнăçласа пыма тытăнтăмăр тесен те йăнăш пулмасть. Май килнĕ таран пĕчĕк утăмсем тусах çак «аякри ĕмĕте» çывхартатпăр.
Акă иртнĕ çул Культура çуртĕнче чылай ĕçсем туса ирттертĕмĕр. Кунта электричество пралукĕсене çĕнĕрен улăштартăмăр, сигнализаци кĕртрĕмĕр. Унсăр пуçне ăшă пыракан пăрăхсене юсарăмăр, ăна çиелтен çĕнĕрен авăрларăмăр, пушар сÿнтермелли хатĕрсем туянтăмăр. Кăçалхи çул пушар хăрушсăрлăхĕн ыйтăвĕсене пăхăнса сцена маччине ятарлă шĕвекпе сăрлама палăртнă. Ăна пурнăçлама укçа-тенкĕ уйăрнă та ĕнтĕ, çанталăк ăшăтсан ĕçе тытăнатпăр. Вырăнти бюджет уйăрнă укçа-тенкĕне тăкакланисĕр пуçне халăха валли тÿлевлĕ мероприятисем йĕркеленĕ, укçа-тенкĕпе те Культура çуртне тирпей-илем кĕртнĕ çĕре усă куратпăр, пурлăхпа техника базине вăйлатса пыратпăр. Çак укçапа эпир сасă вăйлатакан оборудовани, сĕтел, фотоаппарат туянтăмăр. Унсăр пуçне Культура çуртне шал енчен капăрлатас тĕллевпе чÿрече каррисем илсе çакрăмăр. Маччана та хальхи вăхăт ыйтнă пек çĕнетсе улăштартăмăр. Ăна художествăлла пултарулăх культурин ертÿçи А.Скворцов хăех ăсталарĕ.
Культура çуртĕнче ял тăрăхĕн администрацийĕ, тĕслĕх библиотека вырнаçнă. Эпир вĕсемпе тачă çыхăнса ĕçлетпĕр. С.Скворцова библиотекарь «Кĕтеснер тăрăхĕнчи çăл куçсем» ятлă электронлă презентаци хатĕрлесе районти конкурсра малти вырăна çĕнсе илсе Диплома тивĕçрĕ.
«Чăваш Республикинче ял тăрăхĕсенче çурт-йĕре комплекслă майпа компактлă лартас тата вĕсене тирпей-илем кĕртес енĕпе пилот проекта пурнăçласси çинчен» Указа пурнăçлассипе пирĕн ял тăрăхĕн администрацийĕ кирлĕ документсем хатĕрлет. Кунта культура çуртне модернизацилессипе анлă ĕçсем туса ирттерме палăртаççĕ. Тепĕр майлă каласан, эпир пĕрре те шанăçа çухатмастпăр, мĕншĕн тесен халăх Культура çуртне туртăнать, вăл пире шанать. Сăмахран, кăçалхи концерта та çав тери хапăл туса йышăнчĕ. Çамрăксем те культура çуртне туртăнаççĕ. Кану кунĕсенче вĕсем валли кашнинчех ташă каçĕсем, тĕрлĕ конкурссем ирттеретпĕр. Чăваш эстрада юрăçисене те хамăр патне тăтăшах хăнана чĕнетпĕр. Шупашкарти «Апельсин каччисем» эстрада юрăçисене пирĕн ял халăхĕ культура çуртĕнче хапăл туса кĕтсе илчĕ. Вĕсен юрри-ташшисемпе чылайччен киленсе савăнчĕ.
Районта иртекен тĕрлĕ культурăллă мероприятисене те активлă хутшăнатпăр. «2009 çулхи чи лайăх культура ĕçченĕ» конкурсра виççĕмĕш вырăн çĕнсе илме пултарни маншăн пысăк çитĕнÿ. «Чи лайăх Хĕл Мучипе Юр пике» конкурса та кашни çулах хутшăнатпăр, кăçал та парне илме тивĕçлĕ пултăмăр. «Ачалăхшăн, ачалăх ячĕпе» конкурсра Н.Сотников, К.Емельянов, К.Иванов хальхи вăхăтри ташăпа халăха савăнтарчĕç.
Пĕр сăмахпа каласан, культура çуртне çĕнетме пирĕн тĕрлĕ майсем пур. Вырăнти халăхăн культура енне туртăм вăйлансах пырать. Юлашкинчен сăмахăма сăвă йĕркисемпе вĕçлес кăмăл пур:
Кăвар чĕреллĕ ĕçченсем пулсассăн,
Халăх вăйне эс чунупа туйсассăн,
Кермен пек клуб та ял варрине ларĕ,
Кану вучахĕ ялкăшса хĕмленĕ.