19 марта 2010 г.
«Эмел хатĕрĕсен çаврăнăшĕ çинчен» саккун медикаментсен хакне ÿстерессине тĕрĕслеве илмелли пайăр механизмсем туса хурать. Раççей премьерĕ В.Путин палăртнă тăрăх, саккун медикаментсен хăрушсăрлăхне тата пахалăхпа тивĕçтерес енĕпе çирĕпрех ыйтма палăртать. Чи кирли - вăл медикаментсем тĕлĕшпе патшалăх йĕркелесе тăракан механизм туса хурать, çапла вара киревсĕр ĕçсене сирме, граждансен ирĕкĕпе интересĕсене хÿтĕлеме май килет».
Саккун проекчĕн пĕлтерĕшлĕ çĕнĕлĕхĕсенчен пĕри - «Эмел препарачĕсен хакне патшалăх енчен йĕркелесе тăни» уйрăм пай кĕртни. Вăйра тăракан саккунпа килĕшÿллĕн хаксене патшалăхăн çирĕплетмелле. Çапах та вĕсем грипп эпидемийĕ вăхăтĕнче ÿссе кайни саккуна тĕплĕн хатĕрлесе çитерейменнине çирĕплетнĕ. Проектпа килĕшÿллĕн эмел препарачĕсем туса кăларакансем палăртнă сутлăх хакĕсен чикĕленĕ шайне тата хак тумалли йĕркене пăснăшăн тыттаракан яваплăха çирĕплетнĕ. Пирĕн аптека пирки калас пулсан, кунта хальхи вăхăтра 5 пине яхăн тĕрлĕ эмел сутăнать. Вĕсен пахалăхне Чăваш Республикин социаллă аталану министерствине кĕрекен «Фармация» патшалăх унитари предприятийĕ пăхса, тĕрĕслесе тăрать. Чирлĕ çынсене ку е вăл эмелпе вăхăтра тивĕçтерме тăрăшатпăр, кирлĕ препаратсене заказ та паратпăр. Хакĕсем пирки илсен, вĕсене хăй хакĕнчен ытла пысăклатса сутмастпăр.
Социаллă пĕлтерĕшлĕ тепĕр çĕнĕлĕх - ял халăхĕн эмеле тивĕçме пултараслăхĕ ÿсни. Енчен те вăл вырăнти аптекăра çук пулсан - медицина организацийĕсенче тÿрремĕнех сутма ирĕк пама палăртнă. Паллах, тивĕçлĕ лицензи пулсан.
Ялсенчи çынсене эмелсемпе тивĕçтерессипе фельдшерсем тăрăшаççĕ. Вĕсемпе эпир тачă çыхăнура ĕçлетпĕр.