19 марта 2010 г.
Районти «Хĕрлĕ ялав» хаçат призĕсене çĕнсе илессишĕн хутăш йĕлтĕр эстафети Кивĕ Вăрмар ялĕпе Вăрмар поселокĕ хушшинчи посадка хĕрринче иртрĕ. Çакна палăртмалла: ку ăмăрту Ванкуверти хĕллехи Олимп вăййисенчен пĕрре те кая пулмарĕ. Тĕрлĕ çулсенчи йĕлтĕрçĕсем, районти шкулсен тĕрлĕ класĕсенче вĕренекенсем хушшинче тупăшу çивĕч иртрĕ.
Спорт уявне чаплă лару-тăрура оргкомитет председателĕ, райадминистрацин вĕрентÿпе çамрăксен политикин пайĕн пуçлăхĕ Ю.Соколов уçрĕ, ăмăртура çитĕнÿсем тума, малашлăхра район чысне республикăра та мала çĕклеме сунчĕ. А.Ф.Федоров ячĕллĕ ачасемпе çамрăксен районти спорт шкулĕн директорĕ С.Архипов ăмăртăва хутшăнма кăмăл тăвакан районти шкул командисене регистрацилерĕ. Ăмăртăвăн тĕп судйи Н.Изосимов спорт уявĕн йĕркипе паллаштарчĕ. Унтан спорт судйисем пурне те йĕлтĕр йĕрĕ çине йыхравларĕç.
Спорт ăмăртăвне уçакансем пиллĕкмĕшпе çиччĕмĕш классенче вĕренекен хĕрачасемпе арçын ачасем пулчĕç. Çил пек вăйлă вĕçсе чупса тухса кайрĕç вĕсем стартран. Çивĕч иртрĕ тупăшу. Ку ушкăнра пĕрремĕш вырăна Энĕшпуç команди тухрĕ, иккĕмĕш - Тикаш, виççĕмĕш Чупай командисем пулчĕç.
Унтан 8-9 классенче вĕренекен арçын ачасем 3 километрлă, хĕрачасем 2 километрлă дистанцисенче тупăшрĕç. Çак ушкăнра чупма Чупайри пĕтĕмĕшле пĕлÿ паракан тĕп шкул 2 команда тăратнă. Вăрмарти Г.Е.Егоров ячĕллĕ пĕрремĕш вăтам шкул, Чулкас, Урнар, Кĕлкеш, Пысăк Енккасси, Тикаш, Энĕшпуç, Мăнçырма, Шăхаль шкулĕсен командисем пысăк активлăх кăтартрĕç. Асăннă шкулсенчен Чупайĕнчи пĕтĕмĕшле пĕлÿ паракан тĕп шкул командисем вара малти вырăнсене çĕнсе илчĕç. Кунта вĕренекенсем: К.Линга, Т.Пугачева, В.Иванов, А.Петров, И.Долгова тата ыттисем те пысăк тăрăшулăхпа палăрчĕç. Тикашсем те вĕсенчен кая юлмарĕç. Вĕсем виççĕмĕш вырăна тухрĕç.
10-11 классем хушшинче те тупăшу çивĕч иртрĕ. Ку хутĕнче Пысăк Енккассинчи вăтам шкул команди пĕрремĕш вырăн çĕнсе илчĕ. Энĕшпуçсем те вĕсенчен нумаях кая юлмарĕç, иккĕмĕш вырăна тухрĕç. Чупайĕнчи пĕтĕмĕшле пĕлÿ паракан тĕп шкул команди виççĕмĕш пулчĕ.
Палăртма кăмăллă: районти предприятисемпе организацисенчен те йĕлтĕрпе чупма килекенсем сахал мар пулчĕç. Акă 20-39 çулсенчи хĕрарăмсем икĕ километрлă дистанцие лайăх чупса тухрĕç. Пĕрремĕш вырăн районти Культурăпа кану центрĕнче вăй хуракан О.Владимирова йышăнчĕ. 50-59 çулхисем хушшинче З.Маркова (Кивĕ Вăрмар) çĕнтерÿçĕ ятне тивĕçрĕ. 60 çултан иртнисенчен илес пулсан Т.Ашмарина (Мăнçырма ялĕ) малти вырăнта.
Арçынсенчен хăйсен ушкăнĕнче çĕнтерÿçĕ ятне Н.Михайлов, В.Васильев, Н.Андреев, В.Лирзай (Вăрмар поселокĕ), К.Изосимов (Энĕшпуç ялĕ), Г.Васильев (Хĕрлĕçыр ялĕ), В.Данилов (Кĕлкеш ялĕ), В.Федоров, Г.Андреев (Кивĕ Вăрмар), А.Павлов (Кĕлкеш) çĕнсе илчĕç. Райпо канашĕн председателĕ К.Никитин та пысăк ăсталăх кăтартрĕ.
Спорт уявне йĕркелекенсем мала тухнă спортсменсемпе командăсене грамотăсемпе наградăларĕç, укçан парса чысларĕç, район хаçатне иккĕмĕш çур çула çырăнтарса пачĕç.
«Хĕрлĕ ялав» призĕсене çĕнсе илессишĕн йĕлтĕр эстафетине ирттерме пулăшнă район пуçлăхĕн заместительне - райадминистрацин вĕрентÿпе çамрăксен политикин пайĕн начальникне Ю.Соколова, районти ачасемпе çамрăксен спорт шкулĕн директорне С.Архипова, спорт ăмăртăвĕн судйисене Н.Изосимова, А.Яковлева, ăмăртăва хĕрÿллĕн калаçса ертсе пынă Ю.Ефимова редакци тав сăмахĕ калать. Çавăн пекех А.Ноздрин (Чупай), Н.Изосимов (Энĕшпуç), О.Кузьмин (Кĕлкеш) тренерсем командăсене пысăк шайра хатĕрленине каламалла. Ку ăмăртура тупăшнă командăсем çитес çул та пысăк ÿсĕмсем тăвасса шанас килет. Спорт уявĕ вĕçленчĕ пулин те, халăх саланма васкамарĕ. Вĕсем ăмăртăвăн итогĕсене сÿтсе яврĕç, малашлăх тĕллевĕсене палăртрĕç.