19 марта 2010 г.
Раççей вĕрентÿ министерствине кĕрекен 344 аслă пĕлÿ заведенийĕсенчен 230-250 кăна юлмалла. Кăçалтан институтсенче, университетсенче пĕлÿ илекен 500 студентран сахалрах пулчĕ пулсан, вĕсенче студентсем илме чараççĕ, 300 студентран сахалраххисене вара вуçех те хупма пултараççĕ.
Юлашки икĕ çулта Раççейре аслă пĕлÿ заведенийĕсен çумĕнчи 99 филиала тата 352 представительствăна хупнă. Агентство пуçлăхĕ Н.Булаев палăртнă тăрăх, 500 студентран сахалрах вĕренекен филиалсем тупăш кÿреймеççĕ. Раççейре пĕлÿ пухакан 100 студентран сахалрах филиалсем 146 шутланаççĕ. Вĕсене суту-илÿ киоскĕсемпе танлаштарма пулать. 1990 çулсенче Мускавра тата ытти хуласенче те вĕсен йышĕ «çумăр хыççăнхи кăмпасем пекех» ÿссе ларнăччĕ. Вăл вăхăтра вĕсем халăх ыйтăвне тивĕçтернĕ. Анчах та вăхăт иртнĕçемĕн вăл юрăхсăра тухса пычĕ. «Киоск» пек вĕренÿ учрежденисенчен хăтăлма вăхăт çитрĕ. Вĕсенче пахалăхлă пĕлÿ илесси пирки иккĕленÿллĕ.