19 марта 2010 г.
Учитель ачасене пĕлÿ парать çеç мар, хăй те ĕмĕрĕпех вĕренет. «Куллен аталанса пымасан, хăвăнпа ĕçлемесен паян шкулта нимĕн те тăваймастăн, - тет Кĕлкеш шкулĕнче вĕрентекен учительница Светлана Васильевна Романова. Хăйĕн ĕçĕ, тивĕçĕ калама çук йывăрри пĕрре те кулянтармасть ăна. Пĕрчĕн-пĕрчен пухнă ăсталăхĕпе, паха опычĕпе çĕрĕ-çĕрĕпе ларса çĕнĕ вĕрентÿ материалĕсем хатĕрлет.
Кĕлкеш ялĕнче пурăнакан Светлана Васильевнана пирĕн тăрăхра пĕлмен çын та çук пулĕ тесе шутлатăп. Вăл çак ялтах вăтам пĕлÿ илнĕ. Ун хыççăн Шупашкарти И.Я.Яковлев ячĕллĕ Чăваш патшалăх педагогика университетĕнчи художествăпа графика факультетĕнчен вĕренсе тухнă. Сăмах май каласан, вĕреннĕ вăхăтрах вăл унти преподавательсене хăйĕн нумай енлĕ пултарулăхĕпе савăнтарнă. Уйрăмах спорт енĕпе тата тĕрлĕ выставкăсене активлă хутшăнассипе палăрнă çап-çамрăк хĕр. Пур енĕпе те вашаватскер, паянхи кун та хăйĕн тăван университечĕпе тачă çыхăну тытать вăл. Конференцисене хутшăнать, наука изданийĕсенче пичетленет, ачасене унта экскурсисене илсе каять, тĕл пулусене явăçтарать.
Вĕренсе пĕтерсен, алла диплом илсен, çамрăк специалист тăван яла ĕçлеме таврăннă. Çапла вара паян кунччен тăван шкулта пĕтĕм вăй-халне шеллемесĕр, çав тери тăрăшса ĕçлет хăйĕн юратнă ĕçĕпе Светлана Васильевна. Пире те хăйĕн пек маттур та ĕçчен пулма вĕрентет. Уроксенче те, «Савăнăçлă сăрăсем» кружок занятийĕсенче те пире тĕлĕнмелле ĕçсемпе паллаштарать. Вăл кунĕ-кунĕпех пирĕнпе, ачасемпе. Киле те каç кÿлĕм анчах таврăнать, пушă вăхăчĕ пачах çук темелле. Тутлă ыйхине татсах çак тĕлĕнмелле кăткăс ĕçе пуçăнма кам е мĕн хистенĕ-ха ăна; «Манăн чи хаклă çыннăм, чи пĕрремĕш вĕрентекенĕм анне - Антонина Николаевна Иванова, - тет ку ыйтăва хуравласа Светлана Васильевна. - Вăл мана мĕн пĕчĕкрен чăн-чăн çын пулма, çĕршыва, халăха юратма, хисеплеме вĕрентсе ÿстернĕ». Чăн та, амăшĕ шкулта мĕн тивĕçлĕ канăва тухиччен директор çумĕ пулнăскер, хăйĕн пултарулăхĕпе, ĕçченлĕхĕпе, ырă ĕçĕсемпе Светлана Васильевнăшăн яланлăхах ырă тĕслĕх пулса тăнă.
Кашни урокрах çирĕп те тарăн пĕлÿ парас шухăшпа çутă ĕмĕт тĕллевпе çунатланса пырать учительница. Юратаççĕ ăна ачасем, хисеплеççĕ. Коллективра та ырă ятлă вăл. Светлана Васильевна ыттисене те ĕçре нумай пулăшать. Шкулти Н.А.Афанасьев музейне уçнă çĕрте те унăн тÿпи питĕ пысăк. Шкул ачисемпе вăл унти стендсем тата витринăсем валли питĕ нумай материал пухса хатĕрленĕ, хăех вĕсене илемлетсе вырнаçтарнă. Шкулти коридорта та вăлах илемлетнĕ нумай-нумай стенд чуна хавхалантарать. Сăнарлă ÿнер пÿлĕмне те таçта васканă пек васкатпăр. Пÿлĕм илемлĕхĕшĕн, хăтлăхĕпе пуянлăхĕшĕн те нумай вăй хурать Светлана Васильевна. «Ачасем кунта килсех тăччăр, хăйсене килти пекех туйччăр», - тет. Вăл ертсе пынипе эпир питĕ нумай конкурссенче хутшăнса савăнатпăр, час-часах çĕнтеретпĕр. Экскурсисене çÿретпĕр, чылай çĕре çитсе куратпăр, художниксемпе, артистсемпе, тавра пĕлÿçĕсемпе, çыравçăсемпе паллашатпăр. Çапла вара тавра курăма пуянлататпăр, чун-чĕрепе туйма, йĕри-тавралăха сăнама, юратма тата питĕ хитре çырма, ÿкерме вĕренетпĕр. Акă, манăн юратнă пичче те, Сергей Обручков, Светлана Васильевна пек пулас килет тесех Шупашкарти педагогика университечĕн художествăпа графика факультетне вĕренме кĕчĕ. Пушă вăхăчĕ çукрах пулин те, вăл час-часах пирĕн пата шкула килсе çÿрет, занятисенче Светлана Васильевнăпа пĕрле ĕçлет.
Маттур педагог, педагогика наукисен кандидачĕ, пултарулăх çулне çитĕнÿсемпе такăрлатать. Пирĕн шкул ÿсĕмлĕ аталаннинче ăста вĕрентекен тÿпи те пысăк. Çавăнпа та ĕнтĕ вăл Раççей Федерацийĕн Президенчĕн Грантне илме тивĕçлĕ пулчĕ. Эпĕ Светлана Васильевна ĕçне çÿллĕ шайра хакланăшăн çав тери хĕпĕртетĕп.