19 марта 2010 г.
Чи илемлĕ вăхăт - çуркунне. Çут çанталăк кашни çыннăн чĕринчех ырă туйăм çуратать: юрлас, ташлас, савăнас килет. Çак ырă туйăмсемпе пуçтарăнчĕç Кивĕ Вăрмарти 5-11 классенче вĕренекен хĕр ачасем «Атьăр-ха, хĕр ачасем» конкурса. Çак мероприятинче ăс-тăна аталантаракан шухăшлаттаракан конкурссем пулчĕç. Акă, сăмахран, кăткăс ыйтусем çине тĕрĕс хурав парассипе 7-мĕш класра вĕренекен Т.Серебрована çитекенни пулмарĕ. Кашни ыйтăвах вăл тулли хуравсем пачĕ. Хĕр ачасем хăйсене паллаштарас конкурсра тупăшрĕç. 11-мĕш класра вĕренекен А.Эверскова хаçатсенчи тĕрлĕ фотографисемпе усă курса хăйĕнпе тата юлташĕсемпе паллаштарса чи маттурри пулчĕ. Тутлă апат-çимĕç хатĕрлеме те пĕлеççĕ иккен хĕр ачасем. Салат, çемçе кукăльпе хăпарту тата ытти çимĕç те хатĕрленĕ вĕсем. 5-мĕш класра вĕренекен Е.Волоснова чи тутлă салат хатĕрленине палăртрĕç жюри членĕсем. Тĕрлĕ тум тăхăнса çак тумтире епле çĕлесси тата хăçан тăхăнмаллипе паллаштарса 8-мĕш класра вĕренекен С.Михайлова уйрăмах палăрчĕ. Унăн çулла тăхăнмалли кĕпи чи капăрри пулчĕ.
Тупмалли юмахсен тупсăмĕсене тупассипе 6-мĕш класра вĕренекен И.Семенова чи маттурри пулчĕ. Тÿме хăвăрт лартасси вара пит çăмăлах та мар иккен, анчах 10-мĕш класра вĕренекен И.Иванова хăй питĕ правур пулнипе палăрчĕ. Пур конкурс пĕтĕмлетĕвĕсем тăрăх 10-мĕш класра вĕренекен О.Павлова пĕрремĕш вырăна тивĕçрĕ. Конкурс пурне те килĕшрĕ.
Кивĕ Вăрмар шкулĕ.