19 марта 2010 г.
Ачасен Вăрмарти ÿнер шкулĕнче Шупашкарти Ф.Павлов ячĕллĕ музыка училищин вĕрсе каламалли уйрăмĕнче вĕренекенсен концерчĕ пулчĕ. Тулли зал хăнасен кашни номерне хапăлласа кĕтсе илчĕ. Чăннипех те туйăмлăх, профессионаллăх енĕпе пысăк ăсталăхпа шăранчĕç вĕсен кĕввисем. Э.Леонтьева йĕркеленĕ сценарипе пычĕ мероприяти. Республика тата Пĕтĕм союзри конкурссен лауреачĕ С.Чижиков труба çинче Д.Деликатнăйăн увертюрине, С.Максимова гобойпа Перголезин «Сицилиана» кĕввине, Н.Воронцов та трубапа К. Корепанован «Полька» çеммине, Н.Осипова флейтăпа, А.Борисов фаготпа иккĕн пĕрле Самертинин сонатин пĕрремĕш пайне шăрантарнине, труба çинче вылякансен дуэчĕ Гречанинăн «Песня», Глинкăн «Полькине» хăюллăн та хавхалануллăн янратнине, Н.Осипова М.Алексеевăн «Скерцо» кĕввине флейтăпа шăрантарнине залрисем питех те хапăлласа кĕтсе илчĕç. Уйрăмах брасс-квинтетăн С.Чижиков, В.Воронцов (иккĕшĕ те труба), С.Семенов (валторна), В.Молостовкин (тромбон), Л.Леонтьев (туба) вылянине, вĕсем пысăк профессионаллăхпа шăрантарнине тăвăллăн алă çупса кĕтсе илчĕç. Брасс-квинтетăн концерт программине хатĕрлеме ЧР культурăн тава тивĕçлĕ ĕçченĕ А.Чижиков преподаватель нумай тăрăшнă, вăй-хал хунă.
Концерта А.Романова, К.Васильев, ЧР культурăн тава тивĕçлĕ ĕçченĕ Е.Ананьева концертмейстерсем фортепианăпа выляса хавхалантарса ертсе пычĕç.