19 марта 2010 г.
Чăваш Республикин тăваттăмĕш суйлаври Патшалăх Канашĕн депутачĕн мандатне Куславкка пĕр мандатлă 6-мĕш суйлав округĕпе илнĕ В.Тимофеев урăх ĕçе куçнă май парламентри унăн вырăнĕ пушаннăччĕ.
Хушма суйлава çÿллĕ шайра ирттерес тĕлĕшпе Куславкка, Сĕнтĕрвăрри тата Вăрмар районĕсен территорийĕсенчи 93 суйлав участокĕнче пысăк ĕç туса ирттернĕ: суйлавçăсене суйлав, унăн вăхăчĕ тата сасăлав йĕркине тăтăш ăнлантарнă, унăн пĕлтерĕшĕ пирки калаçнă, халăх йышлă пулакан вырăнсенче, участокри суйлав пÿлĕмĕсенче информаци стенчĕсем йĕркеленĕ, уяв сĕмĕ, хăтлăх кĕртнĕ.
Мартăн 14-мĕшĕнче 93 суйлав участокĕ те ирхи сакăр сехетре уçăлнă. Вăл шутра пирĕн районтан 4 ял тăрăхĕнчи - Энтрияль, Пысăк Енккасси, Пинер, Кĕлкеш - 12 суйлав участокĕ хăйсен алăкĕсене уçнă.
Суйлава 281 сăнавçă хутшăннă, участок комиссийĕсен 122 членĕ канаш пама пултаракан правăпа усă курнă. Суйлавçăсен хастарлăхĕ хальхи суйлавра 2006 çулхи октябрĕн 6-мĕшĕнчи суйлавринчен самай ÿснĕ. Куславкка пĕр мандатлă 6-мĕш суйлав округĕн суйлав комиссийĕ пĕлтернĕ тăрăх, вунă сехет тĕлне суйлавçăсен - 9,68, 14 сехет тĕлне 37,55 процент сасăланă. Участоксенчи комиссисен ĕçĕ вĕçленнĕ тĕле суйлавçăсен 57,94 проценчĕ е 23 пин суйлавçă бюллетень илнĕ. Ку 2006 çулхи шайран 11,85 процент пысăкрах.
Суйлав пĕтĕмлетĕвĕ çапла: «Справедливая Россия» парти сĕннĕ Л.Григорьев кандидатшăн суйлавçăсен 18,8 проценчĕ сасăланă. В.Длинов кандидат (РФКП) 14,96 процент сасă пухнă. РЛДП кандидачĕшĕн С.Николаевшăн сасăланисен шучĕ - 3,44 процент. «Единая Россия» парти тăратнă А.Разумов кандидатурипе суйлава хутшăннă суйлавçăсен 59,49 проценчĕ килĕшнĕ.