19 марта 2010 г.
Иртнĕ юн кун пирĕн районта черетлĕ Пĕрлехи информаци кунĕ иртрĕ. Вăрмар тăрăхне Шупашкартан халăхпа тĕл пулма Суд департаменчĕн ЧР Управленийĕн начальникĕ В.Петров, Федераллă службăн Чăваш Республикинчи патшалăх статистикин руководителĕн çумĕ Л.Егорова, «Чăваш Республикинчи çĕр кадастр палати» федераллă патшалăх учрежденийĕн пуçлăхĕ Т.Матвеева, Чăваш Республикинчи культура, национальноçсен ĕçĕсен, информаци политикин тата архив ĕçĕн министрĕн çумĕ А.Усов килсе çитрĕç. Кун йĕркинчи тĕп ыйтусем - çурхи уй-хир ĕçĕсене агротехника требованийĕсемпе килĕшÿллĕн, вăхăтра йĕркелесе ирттерсе ярасси, районта сухаламасăр усăсăр выртанкан çĕрсене пусă çаврăнăшне кĕртесси тата Аслă Отечественнăй вăрçăра çĕнтернĕренпе 65 çул çитнине хатĕрленсе кĕтсе илесси - пулчĕç. Район пуçлăхĕпе В.Кирилловпа тĕл пулса районăн социаллă экономикăллă аталанăвĕпе паллашнă хыççăн ĕçлĕ ушкăнсем Аслă Чак, Кавал, Кĕтеснер ял тăрăхĕсене тухса кайрĕç.
Аслă Чак. Суд департаменчĕн ЧР Управленийĕн начальникĕ В.Петров, «Чăваш Республикинчи çĕр кадастр палати» федераллă патшалăх учрежденийĕн директорĕ Т.Матвеева тата райадминистрацин ĕçĕсен управляющийĕ - организациллĕ ĕçсен пай начальникĕ Н.Павлов Аслă Чак ял тăрăхĕнче пулса унта ĕçлекенсемпе тĕл пулса калаçрĕç. Ĕçлĕ ушкăнрисем халăхпа ялти библиотекăра тĕл пулчĕç. Валерьян Петрович Чăваш Республикин Президенчĕ Н.Федоров çĕрпе тухăçлă усă курмаллине тата пĕрчĕллĕ культурăсемпе тымар çимĕçсене халичченхинчен ытларах туса илме тĕллев лартнине палăртрĕ. Апла пулсан пирĕн çитес çуракинче çанă тавăрсах ĕçлемелле. Унсăр пуçне кун йĕркинчи ытти ыйтусем тавра та пычĕ калаçу.
Кĕтеснер. ЧР Культура министрĕн çумĕ А.Усов тата район пуçлăхĕн заместителĕ - райадминистрацин вĕрентÿпе çамрăксен политикин пайĕн начальникĕ Ю.Соколов Кĕтеснер ял тăрăхĕнче пулчĕç, ял тăрăхĕн администрацийĕнчи культура, библиотека ĕçченĕсемпе тĕл пулчĕç. Ун хыççăн вăтам шкулта вĕрентекенсемпе тĕл пулса кун йĕркинчи ыйтусем тавра калаçрĕç. Александр Борисович çĕнтерÿ кунĕ нихăçан кивелми уявсенчен пĕри пулнине, Кĕтеснер шкулĕнче çитĕнекен ăрăва патриотла воспитани парас ĕçе лайăх йĕркеленипе кăмăллă пулнине палăртрĕ. Тăван çĕршывăн Аслă вăрçинче çĕнтернине 65 çул çитнине хатĕрленсе ирттерекен мероприятисен планĕ çинче те чарăнса тăчĕ.
Юлашкинчен граждансене хăйсен ыйтăвĕсемпе йышăнчĕç.