Публикации » Çулсене юртан тасатаççĕ

12 марта 2010 г.

Пирĕн районта çул-йĕрсене пăхса тăрассипе «Чăвашавтодор» акционерсен уçă обществин Вăрмарти çул-йĕрĕн юсавпа строительство участокĕ ĕçлет. Çул-йĕре юртан тасатма хальхи вăхăтра пурĕ 9 единица техника уйăрнă. Вĕсем муниципаллă, республика пĕлтерĕшлĕ çулсене пăхса тăраççĕ. Акă нумаях пулмасть чукун çул урлă хывнă кĕпер çинче çул-йĕре юртан тасатассипе чылай ĕçсем пурнăçларĕç. Кунти рабочисем çулăн айккине юртан хырса тасатрĕç. Çавăн пекех Пăртас чарăну вырăнĕ патĕнче те ĕçсем кал-кал пычĕç. «Кăçалхи çул юр нумай çунине пăхмасăрах автобуссем тĕрлĕ маршрутпа çÿрекен çулсене вăхăтра тасатса тăтăмăр, пăрлак çанталăкра хăйăрпа тăвар хутăшĕ сапрăмăр. Çанталăк ăшăтса пынă май, çул-йĕр çинчи путăк-шăтăксене юсама тытăнăпăр», - тет А.Павлов пуçлăх.