09 марта 2010 г.
/img_0359.jpg "Стипендиат: Руслан Боредский")
Турри кама мĕн парать. Пĕри вĕренессипе малта пырать, тепри вара спорт енĕпе вăйлă. Пинер ялĕнче çуралнă, çак ялтах 8 класс пĕтернĕ Руслан Боредский халĕ 16 çулта. Çак çула çитнĕ çĕре спортра калама çук пысăк çитĕнÿсем тунă. Районта иртнĕ ăмăртусенче вăл пĕр иккĕленÿсĕрех призлă вырăнсене йышăннă.
Республикăра çăмăл атлетикăпа, велосипедпа чупассипе иртекен ăмăртусенче яланах малта пулнă. Халĕ Руслан Шупашкарти Олимп резервĕсен училищинче вĕренет. Çав вăхăтрах вăл шоссе çинче велосипедпа чупас енĕпе Раççей спорт мастерĕн кандидачĕ, ЧР тата Атăлçи Федераци тăрăхĕн велосипедпа чупакансен пĕрлештернĕ командин членĕ. 2010 çулта Руслан ЧР Президенчĕн Н.Федоровăн çулсерен паракан стипендине тивĕçнĕ. Пултаруллă спортсмен çак сумлă хаклава чăннипех тивĕçлĕ.