05 марта 2010 г.
Паянхи чи пысăк çивĕч ыйтусенчен пĕри вăл - клубсем тата ялсенчи Культура çурчĕсем мĕнлерех пулни. Пирĕн районти клубсенчен çурри ытла иртнĕ ĕмĕрĕн 70-мĕш çулĕсенче туса лартнисем. Чылайăшне нумай çул хушши юсаман, вĕсене тĕпрен çĕнетмелле, техника тĕлĕшĕнчен модернизацилемелле.
Чăваш Ен Президенчĕ Н.Федоровăн «Чăваш Республикинче ялсенчи культура учрежденийĕсене аталантармалли мерăсем çинчен» Указĕ клубсене тĕпрен çĕнетме май парать. Ăна Чулкас ял тăрăхĕн администрацийĕ, эпир, культура учрежденийĕнче вăй хуракансем, тĕллевлĕ пурнăçласа пыратпăр. Çавна май иртнĕ çул Культура вучахне çĕнетессипе чылай ĕçсем туса ирттертĕмĕр. Капиталлă юсав ĕçĕсем пурнăçлама «Урмарская» коллективлă строительство организацийĕ» акционерсен хупă обществи чылай пулăшрĕ. Вĕсем тăрăшнипе Культура çурчĕн юхăнса ларакан çивиттине çĕнĕрен витнĕ. Курав залĕн стенисене сăн кĕртнĕ, электричество проводисене улăштарнă. Фойери урайне плиткăсем çыпăçтарнă. Культура çуртне пластик кантăксем лартнă, тимĕр алăксем вырнаçтарнă. Вĕсене пурнăçлама 510 пин тенкĕ тăкакланă.
Хăш-пĕр ĕçсене вара хамăр вăйпах пурнăçланă. Курав залĕнчи урайне, артистсем хывăнса тăхăнмалли пÿлĕмĕн стенисене, урайне сăрланă. Кăçалхи çул Культура çурчĕ умне тирпей-илем кĕртме планлатпăр.
Модернизаци программи çапла палăртать: республика культурăпа кану учрежденийĕсене сасă вăйлатакан, çутă, видеопроекци оборудованийĕпе, музыка произведенийĕсене аранжировка тумалли программăллă компьютерсемпе, лазерлă принтерпа, сканерпа, сцена валли костюмсен комплекчĕпе, сцена тумĕпе тивĕçтерет. Çаксем пирĕн Культура вучахĕ валли те пуласса шанатпăр. Ачасемпе çамрăксен канăвне усăллă йĕркелеме 9 кружок йĕркеленĕ.
Унсăр пуçне Культура çурчĕ çумĕнче художествăлла пултарулăх коллективĕ, хĕрарăмсен «Çăл куç» ансамблĕ ĕçлет. И.Игнатьевпа И.Максимова культура ĕçĕсен йĕркелÿçисем яш-кĕрĕмпе, хĕр упраçпа культурăпа массăллă мероприятисем тăтăшах ирттереççĕ, кашни çулах районта иртекен конкурссене активлă хутшăнаççĕ.