05 марта 2010 г.
Сергей Лукич Лукин тесенех Вăрмар районĕнче кăна мар, Чăваш Енри нумай ял хуçалăх ĕçченĕсем Мичурин ячĕллĕ колхоза 22 çул ертсе пынă мухтава тивĕçлĕ çынна аса илеççĕ. Çак тĕлĕнмелле пултаруллă, хуçалăхшăн, халăхшăн ырми-канми ĕçленĕ руководитель çинчен кĕскен чарăнса тăрасшăн. Сергей Лукич ĕçĕнче чапа тухнă çын пулнă пулсан та, хăйне нихăçан та мăн кăмăллăн тытмастчĕ, кашни колхозникпах, специалистпа пĕр тан калаçатчĕ. Вăл тăрăшнипех ĕнтĕ колхозра производство объекчĕсем кăна мар, социаллă объектсем те нумай хăпарнă. Вăл шутра Эçпепери шкулăн çĕнĕ çурчĕ, ача сачĕ, асфальт сарнă çул, уйрăм çуртсене газ кĕртни тата ытти те. Ял хуçалăхĕнчи пысăк çитĕнÿсемшĕн 1979-мĕш çулта Социализмла Ĕç Геройĕ, 1984-мĕш çулта «Чăваш Республикин тава тивĕçлĕ ял хуçалăх ĕçченĕ» ятсене тата нумай наградăсене тивĕçлĕ пулнă. Хăйне шеллемесĕр, канăçсăр ĕçлетчĕ. Ăна кашни кунах ирхине 5-6-сехетре е выльăх-чĕрлĕх ферминче, е машинăпа трактор паркĕнче курма пулатчĕ. Пултарулăхне, сăваплă ĕçĕсене кура Сергей Лукича халăх шанатчĕ, хисеплетчĕ, юрататчĕ. Ăна пĕлнĕ çынсем унăн ятне паян та ăшшăн асăнаççĕ. Тăван çĕршывăн хÿтĕлевçисен кунĕ унăн призĕсене çĕнсе илессишĕн шашка ăмăртăвĕ иртрĕ. Турнира ялти культура ĕçченĕ Г.Иванова уçрĕ. Унтан депутатсен район Пухăвĕн депутачĕ Л.Лукин сăмах илчĕ. Ялти хресчен (фермер) хуçалăхăн пуçлăхĕ В.Яковлев Сергей Лукичпа пĕрле ĕçленĕ вăхăта аса илчĕ, чăнахах та ĕçлеме юратакан, çынсене хавхалантарса ĕçлеттерме пĕлекен пулнине çирĕплетрĕ. «Родина» ЯХПК колхоз ертÿçи Н.Туймедов та турнира хутшăнчĕ. Ăмăртура пĕринчен тепри маттур. Пĕрремĕш вырăна В.Павлов, иккĕмĕшне А.Михайлов, виççĕмĕшне В.Борьков тивĕçлĕ пулчĕç. Çĕнтерÿçĕсене Л.Лукин Диплом, укçан парса хавхалантарчĕ.