05 марта 2010 г.
Вунă çул хушши Энĕшпуçĕнче СССР спорт мастерĕсене - пĕртăван Ивановсене асăнса йĕлтĕрçĕсен ăмăртăвĕ иртет. Вăл ял картинчен тухса район, республика шайне хăпарчĕ.
Кăçалхи йĕлтĕрçĕсен ăмăртăвĕ те спортăн çак тĕсне кăмăллакан Шупашкар, Канаш, Хусан, Çĕрпÿ, Сĕнтĕрвăрри, Куславкка, Вăрмар, Тăвай, Тĕрлемес, Чупай, Пысăк Енккасси, Кĕлкеш, Хĕрлĕçыр, Мăнçырма, Çĕнçырма, Элпуç, Шăхаль тата ытти тăрăхри çĕр-çĕр çынна пĕр çĕре йыхравларĕ. Ахаль йĕлтĕрçĕсемпе профессионал-спортсменсем, пушар хуралĕн офицерĕсем, пĕр тăван Ивановсемпе пĕрле службăра тăнă ветерансем, шкул ачисем Энĕшпуçĕнчи вăтам шкула пуçтарăнчĕç. Йăлана кĕнĕ тăрăх спорт уявĕ хамăр ентешсене сума суса ирттерекен митингпа уçăлчĕ. Ăна шкулти Çар Мухтавĕн музейĕн руководителĕ, паллă тавра пĕлÿçĕ И.Криков уçрĕ. Вăрмар район администрацийĕн пуçлăхĕн çумĕ - райадминистрацин вĕрентÿпе çамрăксен политикин пайĕн пуçлăхĕ Ю.Соколов, Раççей Чрезвычайлă лару-тăру министерствин Республикăри Тĕп управленийĕн пуçлăхĕ С.Антонов, Вăрмарсен Шупашкарти ентешлĕхĕн вице-президенчĕ В.Нягин, Энĕшпуç ял тăрăхĕн пуçлăхĕ О.Иванов, Красноармейски районĕнчи Упи ял тăрăхĕн пуçлăхĕ В.Григорьев уяв ячĕпе саламларĕç. Митинга хутшăннă вăрçă ветеранĕсемпе тыл ĕçченĕсем «1418 çĕнтерÿ утăмĕсем» ятпа старта тухрĕç. Ун хыççăн ветерансен ушкăнĕ ял варринче вырнаçнă палăк умне, пĕр тăван Ивановсем çуралса ÿснĕ çурт çинчи асăну хăми çине 65 кĕл чечекĕсем хучĕç, вăрçăра пуç хунă ентешсене асăнса салют пачĕç. Вăрмарсен Шупашкарти ентешлĕхĕ Аслă Çĕнтерĕвĕн 65 çулхи юбилейне халалласа кăкăр çине çакмалли ятарлă «Хĕрлĕ Çăлтăр» медаль кăларнă. Асăннă медале ветерансен ушкăнне С.Антонов полковник парса чыс турĕ. Станислав Юрьевич ял тăрăхĕн пушар хуралĕн ĕçĕ-хĕлĕпе паллашрĕ, ялти тĕслĕх библиотекăра пуçламăш классенче вĕренекен ачасемпе уçă урок ирттерчĕ. Урок юхăмне хастар хутшăннă вĕренекенсене йĕлтĕр комплекчĕсемпе вĕрентÿ хатĕрĕсем парнелерĕ. Юлашкинчен ветерансемпе хăнасем вăтам шкулти Çар Мухтавĕн музейĕнче пулчĕç.
Ăмăртăвăн тĕп судйи Г.Исаев спортсменсене ăмăрту йĕркипе паллаштарчĕ. Ун хыççăн йĕлтĕр ăмăртăвне хутшăнакансем 8 ушкăна пайланса ял хĕрринчи вăтам шкулăн стадионне пуçтарăнчĕç. Йĕлтĕр йĕрĕ çине чи малтан 2-9 классенче вĕренекенсем тăчĕç. Çивĕч кĕрешÿре çĕнтерÿçĕсем те палăрчĕç. Акă вĕсем: С.Данилова, Т.Кузьмина (Кĕлкеш), М.Дмитриева, С.Павлова, А.Петрова, Е.Сергеев, В.Иванов, А.Герлов (Энĕшпуç), И.Гаврилова (Тăвай районĕ, Элпуç), И.Иванова, И.Кириллов (Тăвай районĕ, Çĕнçырма), А.Иванов, К.Линга, (Чупай), И.Васильев, А.Семенов, Е.Ильин (Çĕрпÿ), А.Андреева (Пысăк Енккасси), С.Васильев (Шăхаль). Аслă классенче вĕренекен яшсемпе хĕрсен тупăшăвĕнче А.Румянцева (Пысăк Енккасси), Ю.Николаев (Энĕшпуç), Д.Щербеев, Э.Максимова, А.Максимов (Çĕнçырма), Т.Пугачева (Чупай) çĕнтерме пултарчĕç.
30-59 çулхи ушкăнсене кĕрекен спортсменсем тĕрлĕ километрлă дистанцисенче хăйсен вăйĕсене тĕрĕслерĕç. Арçынсенчен - В.Сидоров, Г.Мельников, В.Иванов, С.Тасяков, Ю.Осипов, А.Голубев, С.Михайлов(Шупашкар), В.Николаев (Çĕрпÿ), В.Федоров (Кивĕ Вăрмар), А.Павлов (Кĕлкеш), В.Захаров (Куславкка), Г.Васильев (Хĕрлĕçыр) - малти вырăнсене тухрĕç, хĕрарăмсенчен З.Маркова (Вăрмар), С.Орлова (Тĕрлемес), О.Яковлева, И.Николаева (Энĕшпуç) - пĕрремĕшсем пулчĕç.
60-70 çулхи арçынсем хушшинче пĕрремĕш вырăнсене А.Герасимов (Шупашкар), Н.Михайлов (Вăрмар), А.Гайфуллина (Хусан), Т.Ашмарина (Кавал) тухма пултарчĕç.
Мала тухнă пур призерсене те хаклă парнесем пачĕç, грамотăсемпе наградăларĕç, медальсем парса чыс турĕç.