05 марта 2010 г.
(Ĕлĕкрех уява мĕнле паллă тунă)
Архив материалĕсем акă мĕн кăтартаççĕ: 1931 çулта районти хĕрарăмсен организацийĕ уяв тĕлне анлă план йышăннă. Çакна пурнăçлама районти ялсенче, халь çеç аталана пуçланă колхозсенче ĕçе тытăннă. Тĕслĕхрен, Кĕçĕн Чакри «РКИ» колхоз хĕрарăмсемпе ĕçлессине пысăк вырăна хурса ятарласа план çирĕплетнĕ. Лайăх ĕçлекен хĕрарăмсене экскурсисене ямалла, колхоз членне илсе ĕçпе тивĕçтермелле, обществăлла хушусем памалла, ударлă ĕçлекенсене уявра парнесем парса чысламалла тесе çирĕплетнĕ. Кунтах вĕсене пĕлÿ парас ыйтăва та хускатнă. Çак тапхăрта вĕренме каякан хĕрарăмсен ачисене черетпе пăхмалла тенĕ. Çав хушăрах коопераци членне илме тытăннă, ача сачĕсем уçас ыйтăва хускатнă. Хаçат-журналсем çырăнтарса пурнăçпа тан утма вĕрентнĕ.
1933 çулта уява тивĕçлĕ шайра ирттерме Калинин ячĕллĕ колхоз тăрăшсах хатĕрленнĕ. «Хĕрарăмсен уявне çÿлти шайра йĕркелесе ирттерес, колхозра хастар ĕçлесе пыракан 18 хĕрарăма парнесем парас, вĕсене чысласа ташă-юрă каçĕ ирттерме укçа тÿлесе вăйăç тытас», тесе йышăннă колхозăн правлени ларăвĕнче.
Тупахри «Тукас» колхозăн тепĕр тĕслĕхĕ çинче чарăнма кăмăллă. Хĕрарăмсем хушшинче трахома чирĕпе асапланакансен шучĕ нумайланнă. Çитес çул çурхи уява савăнăçлă кĕтсе илес тĕлĕшпе иккĕмĕш бригадăри колхозницăсем пуху пухса ялта трахома чирĕнчен тасалас ыйтăва пăхса тухнă. «Пирĕн тĕллев - чирлисене сыватасси. Çак ĕçе витĕмлĕрех тăвас шутпа Тупах ялĕнче ĕçлеме ятарласа трахсестра ыйтас», - тенĕ пухăннисем...