05 марта 2010 г.
Пĕтĕм Раççейри «Çулталăк почтальонĕ» конкурс ирттернĕ чухне хальхи информаципе коммуникаци технологийĕсемпе усă курĕç. Унта 7 федераллă округри 23 почтальон хутшăнĕ.
Регион шайĕнчи çĕнтерÿçĕсем видеоконференци йĕркипе хăйсене кăтартĕç. Ку çĕнĕлĕх почтальонсене кулленхи ĕçрен чăрмантармасăр çыру, пенси, хаçат-журнал çитернисĕр пуçне урăх хуласенче иртекен конкурссене хутшăнма май парать. Видеокалаçу мелĕпе почтальонсем хăйсене презентацилеççĕ, хальхи вăхăтра Почта правилисене, истори факчĕсене, почта çыхăнăвĕн пулăшăвне кÿрессин правилисене пырса тивекен ыйтусем çине тĕплĕн хуравламалла.
Çак конкурса 2010 çулхи апрелĕн 20-мĕшĕччен пĕтĕмлетмелле. Çĕнтерÿçĕсем Мускавра Раççей Почтин кунĕ ыран тенĕ кун иртекен финала хутшăнĕç. Пĕтĕм Раççейри «Çулталăк почтальонĕ» професси ăсталăхне туптакан конкурс Раççей Почтин клиенчĕсене кÿрекен пулăшу пахалăхне тата культура шайне ÿстерме пулăшĕ.
Атăлçи Федераллă округран çак конкурса Кавалти çыхăну уйрăмĕнчи почтальонка Н.Алексеева та хутшăнĕ. Пултаруллăскер вăл пирĕн - Вăрмар почтамтчĕн мухтавĕ. 2009 çулта вăл тивĕçлипех «Раççей почти» федераллă патшалăх унитарлă предприятин филиалĕн Чăваш Республикинчи федераллă почта çыхăнăвĕн управленийĕ ирттернĕ «Çулталăкри почтальон» конкурсра «Çулталăк почтальонĕ» ята илчĕ. Хăш-пĕр цифрăсене кăна илер. Иртнĕ çул вăл ун умĕнхипе танлаштарсан халăха тĕрлĕ енлĕ пулăшу парассине тата таварсемпе тивĕçтерессине 17 процент ирттерсе пурнăçланă. Хаçат-журналсем, посылкăсемсĕр пуçне уйăхсерен 110 çынна пенси укçипе вăхăтра тивĕçтерет, вĕсене ытти тĕрлĕ енлĕ пулăшу кÿрет. Хаçат-журнал çырăнакансен йышĕ те вăл çаврăнакан хуçалăхсенче кашни çур çулта ÿссе пырать.
Ялти çыхăну уйрăмĕн начальникĕ Л.Ланина Надежда Апполоновнана ырă сăмахпа кăна асăнать. «Почтальон пулса ĕçе кĕрес текенсене киле кин кĕртнĕ чухнехи пекех суйларăм. Пĕрре те йăнăшмарăм», - тет халĕ савăнса Людмила Вонифатьевна. Халĕ Пĕтĕм Раççейри конкурса кайма тивĕç пулнă «кине» чи малтанах унта пысăк çитĕнÿсем тума тÿсĕмлĕхпе ăнăçу сунатпăр.