05 марта 2010 г.
Иртнĕ эрнере ЧР Президенчĕ Н.Федоров Хĕрлĕ Чутай тăрăхĕнче пулнă: малтанах Тралькассинчи пĕтĕмĕшле çемье врачĕн офисне уçма хутшăннă. Хăтлă çуртра чирлисене йышăнмалли пÿлĕмсем, кăнтăрла сипленмелли стационар палати вырнаçнă. Кунта ку чухнехи сиплев оборудованийĕпе ятарласа вĕреннĕ тухтăр тата виçĕ медицина сестри ĕçлĕç. Чăваш Енре çакăн йышши офиссем - 600.
Николай Васильевич офиспа паллашнă, ĕçлекенсене медицина оборудованийĕ туянма 100 пин тенкĕлĕх сертификат панă. Унтан вăл «Коминтерн» ял хуçалăх пĕрлешĕвĕн сысна фермине çитсе курнă, çакна палăртнă: юлашки 4 çулта хуçалăхра производство калăпăшĕ 400 процент, ĕç тухăçлăхĕ 700 процент ÿснĕ. «Пысăк çитĕнÿсем конкуренцире кĕрешме май парĕç. Патшалăх тăрăшса ĕçлекенсене малашне те пулăшĕ», - тенĕ Н.Федоров. Президент республикăра сĕт тирпейлекен 700 миллион тенкĕлĕх çĕнĕ завод тума палăртнине хыпарланă. Çакă предприятисенчен туянакан сĕт хакне хăпартма май парĕ.
Республика ертÿçи Атнарти çĕнетнĕ Культура çуртне те çитсе курнă. Кунта ĕçлекенсем валли видеопроекци оборудованийĕ, музыка хайлавĕсене илемлетме май паракан компьютер хатĕрĕсем, принтер, сканер, артистсем валли чаплă костюмсем уйăрни çинчен пĕлтернĕ, çакна çирĕплетсе свидетельство панă.
Юлашкинчен Н.Федоров район активĕпе канашлу ирттернĕ. Чылай ĕç-хĕлпе район республика шайĕнчен юлса пырать. Муниципалитетăн татса паман ыйту чылай: выльăх-чĕрлĕх отраслĕнче кăтартусем чакаççĕ, кĕрхи культурăсене палăртнă чухлĕ акса хăварман, хушма хуçалăха аталантаракансене патшалăх пулăшăвĕпе тивĕçтерессине кирлĕ пек йĕркелемен, тăкаклă ĕçлекен предприятисен хисепĕ пысăк, çурт-йĕр тăвасси чакнă. Президент электрон аукционĕсем ирттерессине пысăк тимлĕх уйăрма сĕннĕ, района пултаруллă çамрăк специалистсене илсе килессипе çине тăрса ĕçлемеллине палăртнă. «Йывăрлăхран тухмалли çул-йĕр çĕнĕлле шухăшлакан, çаврăнăçуллă, яваплăха туйса ĕçлекен çынсен хастарлăхĕнче тупмалла», - тенĕ Президент. Район ертÿçисене Ял хуçалăх тата Экономика аталанăвĕпе суту-илÿ министерствипе пĕрле йывăр лару-тăруран тухмалли çул-йĕре палăртма хушнă.