Публикации » Анлăн паллă турĕç

02 марта 2010 г.

Мăнçырмари вăтам шкулта ял тăрăхĕн тата шкул администрацийĕсем пуçарнипе иртнĕ çулсенчи пекех Тăван çĕршыв хÿтĕлевçин кунне халалласа тĕрлĕ енлĕ ăмăртусем пулса иртрĕç. Пĕрремĕш кунĕнче палăртнă вăхăтра пухăннă халăха Мăнçырма ял тăрăхĕн пуçлăхĕ В.Семенов уяв ячĕпе саламланă хыççăн ăмăртусене мĕнле тĕллевпе ирттернипе паллаштарчĕ:

- Афганистанăн сăртлă-туллă çĕре çинче ним айăпсăр пуçне хунă çамрăксем хушшинче пирĕн ял каччи те пур. Михаил Демидовăн ятне асран яманнипе, ăна яланах ырă тĕслĕх вырăнне хунипе палăртатпăр эпир паян тĕрлĕрен ăмăртусене хутшăнса, - терĕ вăл.

Çамрăксем çеç мар, аслă çулсенчи çынсем те, ветерансем те пухăнчĕç шкула. Мĕн çамрăкран спортпа туслă пулнă аслă ăру çыннисем Ю.Михайлов, А.Александров, Н.Иванов ăмăртусене хутшăнма кăмăл туни уява урăх сĕм кĕртрĕ. Вĕсенчен А.Александров, В.Семенов, С.Макаров çамрăксем те юласшăн пулмарĕç.

Волейболла выляссипе ăмăрту çивĕч кĕрешÿре иртрĕ. Кÿршĕри Тикаш ял команди те килнĕ ăмăртусене хутшăнма. «Иштукан» команди хăнасене иккĕмĕш вырăна хăварчĕ, виççĕмĕш вырăна Чапаев урамĕнче пурăнакан çамрăксем çĕнсе илчĕç.

Шашкăлла выляса малти вырăнсене çапла пайларĕç: 1-мĕш вырăнта - Н.Иванов, 2-мĕш - В.Семенов, 3-мĕш - Ю.Михайлов. Алă вăйне виçес енĕпе Н.Романова çĕнме пултаракансем тупăнмарĕç. 2-мĕш вырăнта - А.Михайлов, 3-мĕш - Н.Васильев.

Теннисла выляссипе 1-мĕш вырăна В.Иванов (ЧГПУ студенчĕ), 2-мĕшне Г.Капитонов (9 кл.), 3-мĕшне - В.Игнатьев (10 кл.) тухрĕç.

Тепĕр кунне вĕренекенсен хăйсен пĕлĕвне тата пултарулăхне «Зарница» вăйăра кăтартса памалла пулчĕ. Кĕçĕн класра вĕренекенсем «Хаваслă страт» ăмăртăва хутшăнчĕç.

Паллах, Калашников автоматне кам хăвăртрах сÿтсе пухма пултарнипе тĕрĕслемесĕр пĕр çар ăмăртăвĕ те иртмест. Аслă классенче вĕренекенсем ку ăмăртăвăн тĕллевне питĕ лайăх ăнланаççĕ: вĕсем çывăх вăхăтрах салтак е матрос ятне илтме тивĕç çамрăксем. Савăнăçлă линейкăра чи пултаруллă шкул ачисен командисене грамотăсемпе асăнмалăх парнесем парса чысларĕç.

Калашников автоматне кĕске вăхăтра сÿтсе пухасси çăмăлах мар пулсан та 8 класра вĕренекен Е.Егоров çĕнтерÿçĕ пулчĕ, 2-мĕш вырăнта - А.Архипов (9 кл.), 3-мĕшĕнче - М.Михайлов (11 кл.).

Конкурссене пĕтĕмĕшле хак панă хыççăн 7-мĕш класс чи пултарулли пулни палăрчĕ, вĕсем пуринчен те нумай очко пухма пултарчĕç. Кăшт сахалрах шутпа 9-мĕш тата 8-мĕш класс ачисем палăрчĕç.

Классене «Зарница» вăййа хутшăнма тивĕçлĕ шайра хатĕрлесе çитернĕ командирсене уйрăммăн палăртса хăвармалла, çакăнпа хăйсем çар ретне тăма хатĕр пулнине те кăтартаса пачĕç. Вĕсем: М. Михайлов (11 кл.), Г.Романов, С.Михайлов (10 кл.), А. Архипов, Н. Григорьев, С.Капитонов (9 кл.), Е.Егоров (8 кл.).