Публикации » Çĕр улми уявĕ

02 марта 2010 г.

Республикăра февралĕн 18-19-мĕшĕсенче регионсен «Çĕр улми - 2010» уяв иртнине хаçата вулакансем пĕлеççĕ ĕнтĕ. Форум МТВ-Центрта иртнĕ. Кунта пырса кĕрсенех çынсем каялла-малалла хĕвĕшнине, пĕр-пĕринпе калаçнине курсанах чунĕпе çĕр ĕçне парăннă, хăйсене хĕрхенмеср ĕçлекенсем пуçтарăнни палăрчĕ. Залра тĕрлĕ регионсенче, хамăр республикăри районсенче туса илнĕ ял хуçалăх продукчĕсен сентрисем куçа илĕртеççĕ. Пур культурăсем те пур кунта, анчах та уяв патши - çĕр улми пулчĕ.

Ахальтен мар уявăн тĕп теми - çĕр улмие туса илес, упрас, тирпейлес инноваци технологийĕ - пулчĕ. Форума Чăваш Республикин Президенчĕ Н.Федоров хутшăнчĕ. Вăл «иккĕмĕш çăкăра» мухтаса тĕрлĕрен тĕслĕхсем те илсе кăтартрĕ. Çапла пулмасăр, вăл халăхшăн чи йăлăхтарман тата чухăнлăх вăхăтĕнче, выçлăх çулĕсенче вилĕмрен çăлса хăварнă çимĕçсенчен пĕри-çке. Юлашки çулсенче республикăра пахалăхлă çĕр улми çитĕнтерес енĕпе еплерех çитĕнÿсем пулни пирки те чарăнса тăчĕ Николай Васильевич. Пĕлтĕр республикипе 810 пин тонна туса илнĕ. Чăваш Енре çитĕнтернĕ çĕр улми ытти регионтисемпе танлаштарсан чи пахалăхли. Ахальтен мар ĕнтĕ Мускаври ертÿçĕсем çĕр улми сутнă чухне туянакансене илĕртес тĕллевпе «Чăваш Ен» е «Чăваш Республики» тесе çырса хуни пирки те пĕлтерчĕ Н.Федоров. «Хамăр туса илнĕ продукт мухтанмалăх та савăнмалăх та пур. Анчах та пирĕн кунпа лăпланса лармалла мар. ЧР Президенчĕ Н.Федоров пĕрер миллион тонна тĕш тырă тата çĕр улми туса илме тесе палăртнине çывăх çулсенче пурнăçа кĕртмелле. Пĕлтĕр республикăри çĕр ĕçченĕсем кашни гектартан вăтамран 164,3 центнер çĕр улми туса илнĕ. Раççейĕпе илсен ку цифра 142 центнерпа танлашнă», - терĕ ял хуçалăх министрĕ М.Игнатьев. Уйрăмлăхĕ пуррине вулакан туйса илчĕ пулĕ. Процентпа шута илсен республикăра çĕр улми çитĕнтересси 40 процент ÿснĕ, Раççейре вара - 5. Президента курав экспозицийĕсем те интереслентерчĕç, вăл хаваспах курса çÿрерĕ, хăйĕн ăшă сăмахĕсемпе çĕр ĕçченĕсен кăмăлне çĕклерĕ. Çĕр улми çитĕнтерекенсене тĕрлĕрен ыйтусем пачĕ.

Форума нумай регионти çĕр улми çитĕнтерекенсем, наука учрежденийĕсенчен, Раççей Федерацийĕнчи çĕр улми производствин индустрийĕнче ăнăçлă ĕçлекен компанисемпе агропредприятисен, АПШ, Германи, Голланди, Украина, Беларуç представителĕсем хутшăннă. Вĕсенчен хăшĕ-пĕрисем, конференцинче тухса калаçса, Чăваш Ен - çĕр улми çĕршывĕ пулса тăнине палăртрĕç. Курав-форума пирĕн район администрацийĕн ял хуçалăх, экологи тата çĕрпе пурлăх пайĕнчен Н.Николаев тĕп агроном тата хăш-пĕр фермерсем хутшăнчĕç. Ку хутĕнче хамăр туса илнĕ продуктсене выставкăна тăратма май килмен пулин те, малта пыракансен опычĕпе тата çĕр улмин сорчĕсемпе кăсăкланчĕç.