26 февраля 2010 г.
Иртнĕ эрнере пирĕн районта черетлĕ Пĕрлехи информаци кунĕ иртнĕ. Халăхпа тĕл пулма ЧР Патшалăх Канашĕн председателĕн заместителĕ - вырăнти хăй тытăмлăх тата патшалăх строительстви енĕпе ĕçлекен Комитетăн председателĕ Г.Васильев ертсе пыракан ĕçлĕ ушкăн килнĕ.
Кун йĕркинчи тĕп ыйтусем - Раççей Правительствин Председателĕ В.Путин пирĕн республикăна килсе кайнин итогĕсем; Чăваш Ене малалла та пĕр тикĕс аталантарса пымалли стратегиллĕ проектсем; Автономи облаçне йĕркеленĕренпе 90 çул, Аслă Отечественнăй вăрçăра çĕнтернĕренпе 65 çул çитнине хатĕрленсе кĕтсе илесси; 2010 çулхи тата 2011-2012 çулсенчи республика бюджетне ÿстересси тата укçа-тенкĕне Чăваш Ен аталанăвĕн социаллă пĕлтерĕшлĕ проекчĕсене пурнăçлама ярасси - пулчĕç.
Район пуçлăхĕпе В.Кирилловпа тĕл пулса районăн социаллă-экономикăллă аталанăвĕпе паллашнă хыççăн ĕçлĕ ушкăнсем кун йĕркинче палăртнă ял тăрăхĕсене тухса кайрĕç. Генрих Геннадьевичпа Вячеслав Николаевич Пысăк Енккасси тăрăхĕнче пулчĕç, Урнарти, Саруйĕнчи, Пысăк Енккассинчи, Карăкçырмари шкулсенче тата Пысăк Енккассинчи модельлĕ библиотекăра пулса унта ĕçлекенсемпе тĕл пулса калаçрĕç. Г.Васильев В.Путин республикăна килсе кайнин итогĕсемпе паллаштарчĕ: И.Н.Ульянов ячĕллĕ Чăваш патшалăх университечĕн студенчĕсемпе, преподавателĕсемпе тĕл пулнă, унта аслă вĕренÿ заведенийĕсем çумĕнче наци тĕпчев университечĕсем тата центрĕсем уçас, ачасемпе çамрăксен спортне, туризмне аталантарас, аслă вĕренÿ заведенийĕсем çумĕнче вак тата вăтам предприятисем уçас тата ытти çивĕч ыйтусене пăхса тухнă. В.Путин Шупашкарти промышленность тракторĕсен заводĕнче пулнă хыççăн ку предприятине федераци бюджетĕнчен укçа парса пулăшма калаçса татăлнă. Çавăн пекех ĕçмелли шыв пахалăхне лайăхлатмашкăн, йăлари хытă каяшсене утилизацилемелли хальхи вăхăтри полигон тумашкăн тата ытти малашлăхлă проектсем валли те хушма укçа-тенкĕ уйăрса панă.
Кăçал республикăра икĕ пысăк уява - Автономи облаçне туса хунăранпа 90 çул тата Аслă Отечественнăй вăрçăра Çĕнтерÿ тунăранпа 65 çул çитнине хатĕрленсе кĕтсе илесси çинчен те чарăнса тăчĕ вăл. Çавăн пекех Г.Васильев республика бюджетне ÿстерни çинче те чарăнса тăчĕ. «Чăваш Республикин «Чăваш Республикин 2010 çулхи тата планпа пăхнă 2011 тата 2012 çулсенчи тапхăрти республика бюджечĕ çинчен» саккунне улшăнусем кĕртесси çинчен» саккун проекчĕпе килĕшÿллĕн республикăн 2010 çулхи бюджечĕ ÿсет. Хушма укçа-тенкĕ приоритетлă задачăсене - социаллă-культурăллă мероприятисене йĕркелесе ирттерме, онкологи чирĕпе чирлекенсене паракан медицина пулăшăвне лайăхлатма çĕнĕ йышши оборудовани туянма, вĕрентекенсене класа ертсе пынăшăн тÿлеме тата ытти тĕрлĕрен çивĕч ыйтусене татса пама май парасси çинчен пĕлтерчĕ. Суд департаменчĕн ЧР Управленийĕн начальникĕ В.Петров тата райадминистрацин ĕçĕсен управляющийĕ - организациллĕ пай начальникĕ Н.Павлов Кĕлкеш ял тăрăхĕнче пулчĕç, ял тăрăхĕн администрацийĕнче культура, библиотека ĕçченĕсемпе тата ял çыннисемпе тĕл пулчĕç. Кун йĕркинчи ыйтусене пăхса тухса пурте пĕрле сÿтсе яврĕç. Информаци кунĕ пулассине малтанах пĕлсе тăнă май, çак кун хăйсене пăшăрхантаракан ыйтусем çине туллин хурав илес тесе Тупах тата Çитмĕш çыннисем райадминистрацине тĕрлĕ ыйтусемпе тухнă пулнă. Ял çыннисене ытларах шыв, газ, çул çÿрев ыйтăвĕсем, унсăр пуçне хăш-пĕр çамрăксем ялта ĕçсĕр аптраса эрех-сăра серепине лекни пăшăрхантарать. Çак ыйтусене тĕл пулура хĕрÿллĕн сÿтсе яврĕç.
«Чăваш Автономи облаçне йĕркеленĕренпе 90 çул çитсе пынă май, тĕп хулара тата район центрĕнче кăна мар, пур çĕрте те, çав шутра Кĕлкеш ял тăрăхĕнче те, культура мероприятийĕсем иртĕç, çакă çынсене те, район экономикине те витĕм кÿрĕ. Хамăрăн ума тĕллевсемпе задачăсем лартмалла, вара мĕн ĕмĕтленни пурнăçа кĕретех», - тесе вĕçлерĕ хăйĕн сăмахне Валерьян Петрович. Сăмах май каласан, В.Петров районти халăх мĕнле сывланине пĕлсе тăрать, мĕншĕн тесен унăн пурнăç сукмакĕ пĕтĕмĕпех хамăр районпа çыхăннă. Çавăнпа та пулĕ Кĕлкешсем ăна çав тери çывăх йышăнчĕç, иртнине аса илсе тата малашлăхсем пирки кăмăллăн калаçрĕç. Вăтам шкулта вĕрентекенсемпе те кун йĕркинчи ыйтусем таврах пычĕ калаçу. Унсăр пуçне ачасене тĕрĕс воспитани парса пĕр-пĕрне, ашшĕ-амăшĕсене хисеплеме вĕрентмелли, тавралăха таса та тирпейлĕ тытма ачасене шкул сакки çинченех хăнăхтарса пымалли пирки та чарăнса тăчĕç.
Кун йĕркинчи ыйтусене çавăн пекех Энтрияль, Пинер ял тăрăхĕсенче сÿтсе яврĕç. Вĕсемпе ЧР Вĕрентÿпе çамрăксен политикин министерствинчи надзорпа контроль управленийĕн начальникĕ М.Федотов тата район пуçлăхĕн заместителĕсем - Ю.Соколовпа Л.Петров, Федераллă службăн Чăваш Республикинчи патшалăх статистикин руководителĕн заместителĕ Л.Егорова, «Чăваш Республикинчи çĕр кадастр палати» федераллă патшалăх учрежденийĕн директорĕ Т.Матвеева пулчĕç. Тĕл пулăва хутшăннисене харпăр хăйĕн ыйтăвĕсемпе йышăнчĕç, тĕрлĕрен ыйтусем çине хуравсем пачĕç. Çакăн пек тĕл пулусем халăх ыйтăвĕсене çийĕнчех татса пама тата пĕрлехи ĕç результачĕсене курма пулăшаççĕ.