19 февраля 2010 г.
Чăвашсем ĕмĕртенпех салтак хĕсметне тÿрĕ кăмăлпа пурнăçланипе палăрса тăнă. Хаяр вăрçă çулĕсене е икĕ юлашки ĕмĕрсен чиккинче сике-сике тухнă хĕç-пăшаллă хирĕç-тăрусене илетпĕр-и - ентешсем çар тивĕçне пурнăçланă чухне хăюлăхпа, пултарулăхпа палăрнă. Çавăнпа та патшалăх наградисене, тав çырăвĕсене вĕсем тивĕçлипе илнĕ. Тăнăç вăхăтра та хăйсене лайăх енчен кăтартса çар командованийĕн ыр сăмахне тивĕçекенсем сахал мар. Вĕсенчен пĕри - Мăнçырма каччи Алексей Владимирович Емельянов.
Ялти шкултан, Чăваш патшалăх ял хуçалăх академийĕн механика факультетĕнчен вĕренсе тухнă вăл. 2007 çулта салтака кайма вăхăт çитсессĕн тĕплĕн шухăшланă та çар ретне контракт урлă кайма шутланă. Вăрмар тата Куславкка районĕсен çар ĕç комиссариатĕнчен вăл 3 çуллăха Атăлçи - Урал çар округĕн Пермь крайĕнче вырнаçнă артиллери чаçне лекнĕ. Куншăн пĕрре те ÿкĕнмест ентеш. Унтанпа икĕ çул çурă иртсе те кайнă. Халĕ вăл кĕçĕн сержант. Акă Тоцкри вĕрентÿ центрĕнче, Донгузри полигонта ирттернĕ çар вĕрентĕвĕсенче лайăх енчен палăрнăшăн ăна Грамота парса чысланă, ракетлă çарсемпе артиллери кунĕнче тав сăмахĕ каланă. Нумаях пулмасть вара тăван ялĕнче пурăнакан амăшĕ, С.Александрова, çар чаçĕн командирĕнчен С.Петров полковникран Тав çырăвĕ илчĕ.
«Хисеплĕ Елена Витальевна! - тенĕ унта, - сирĕн ывăлăр, Алексей Владимирович Емельянов, çар тивĕçне тÿрĕ кăмăлпа пурнăçлать. Служба вăхăтĕнче вăл пултаруллă специалист пулнине кăтартса пачĕ. Сире ĕçчен те яваплăха туякан, ума лартнă тĕллеве çине тăрса пурнăçлама тăрăшакан ывăл çитĕнтернĕшĕн тав тăватпăр, телей сунатпăр».
Амăшĕшĕн хăйĕн тĕпренчĕкĕ çинчен ырă сăмах илтнинчен пысăк савăнăç пур-ши вăл? Эпир те Елена Витальевнапа пĕрлех савăнатпăр.