19 февраля 2010 г.
Шăхальте йăлана кĕнĕ йĕркепе Ю.Иванов интернационалист- салтака асăнса волейбол ăмăртăвĕ ирттернĕ. Юрийăн кĕске ĕмĕрĕнчи паттăрлăхне нихăçан та манмалла мар, яланах асра тытмалла. Паттăр, маттур, вăйлă çирĕп пулас тесен - чи малтанах спортпа интересленмелле. Вăл та спортпа питĕ туслă пулнă, тăван çĕршыва, тăван яла, тăван халăха хисепленĕ, юратнă. Афганистанра интернационалла тивĕçе пурнăçланă чухне хăйĕн пурнăçне те шеллемен.
Ăмăртăва савăнăçлă лару-тăрура райадминистрацин вĕрентÿ тата çамрăксен политикин пайĕн начальникĕ Ю.Соколов, Шăхальти пĕтĕмĕшле пĕлÿ паракан вăтам шкул директорĕ А.Мирошкина, республикăри Çар ĕç комиссариачĕн Вăрмар тата Куславкка районĕсенчи пай пуçлăхĕ М.Пуклаков, Шăхаль шкулĕнче вĕренекенсем, интернационалист-салтаксен районти канашĕн председателĕ О.Ильин уçрĕç.
Мероприятие ертсе пыраканĕ Шăхальти физкультура учителĕ Г.Васильев ÿссе пыракан ăрăва çĕршыва юрăхлă çын пулмаллине, сывă пурнăç йĕркине пăхăнмаллине вĕрентсе каларĕ. Пурĕ 7 команда хутшăннă: Шăхаль, Тикаш, Чулкас, Кĕтеснер, Арапуç ял тăрăхĕсен çамрăкĕсем (кашни ялтан пĕрер команда), Шăхаль шкулĕнче вĕренекенсен тата воин-афганецсен командисем.
Тупăшура Тикаш ял тăрăхĕн команди çĕнтерÿçĕ пулнă.