19 февраля 2010 г.
1989 çулхи февралĕн 15-мĕшĕнче Афган çĕрĕ çинчен совет салтакĕсене пĕтĕмпех кăларнă. Унтанпа вăхăчĕ те сахалах иртмерĕ пулин те, вăрçă ахрăмĕ чылайăшĕн асĕнчен тухмасть. Çапла пулмасăр, нумайăшĕ çак вăрçăран аманса таврăннă е тата хăрушăраххи - ĕмĕрлĕхех юлташне çухатнă, куç умĕнче юлташĕ сирпĕнсе кайнине курнă тата ытти чуна пырса тивмелли самантсем куç умне тухаççĕ.
Оборона-массăллă уйăхлăха хутшăнса тата Аслă Отечественнăй вăрçăра çĕнтернĕренпе 65 çул çитнине халалласа, çавăн пекех йăлана кĕнĕ тăрăх Вăрмар поселокĕнчи воин-афганецсене халалласа лартнă палăк умĕнче Афганистанри хĕрÿ вырăнсене хутшăннисемпе шкул ачисем, вĕрентекенсем тата ытти çынсем пуçтарăнса митинг ирттернĕ. Ăна Вăрмар хула тăрăхĕн администрацийĕн пуçлăхĕ В.Иванов уçса районти паттăр каччăсене ырăпа аса илсе мухтанă. Унтан ЧР Çар ĕç комиссариачĕн Вăрмар тата Куславкка районĕсенчи пай начальникĕ М.Пуклаков, район пуçлăхĕн заместителĕ - вĕрентÿпе çамрăксен политикин пайĕн начальникĕ Ю.Соколов, Афган çĕрĕ çинче ĕмĕрлĕхех пуçне хунă Г.Александровăн пиччĕшĕ Н.Александров, воин-интернационалистсен районти канашĕн председателĕ О.Ильин тухса калаçнă. Çамрăксене вĕсенчен тĕслĕх илсе Тăван çĕршыва сыхлама яланах хатĕр пулмалли пирки чĕнсе каланă.
Чечек кăшăлĕсем хурса шăплăх минучĕпе чысланă Афган çĕрĕ çинче ĕмĕрлĕхе выртса юлнисене. Асăну каçĕ Вăрмарти Г.Е.Егоров ячĕллĕ вăтам шкулта малалла тăсăлнă. Кунта пневматикăлла винтовкăран тĕл перес енĕпе ăмăртусем тата патриотла, салтак юррисен конкурсĕ иртнĕ. Районти 16 шкул команди тупăшнă. Пĕтĕмĕшле пĕлÿ паракан вăтам шкул командисем хушшинче пĕр тан 101 очко пухса Вăрмарти Г.Е.Егоров ячĕллĕ пĕрремĕш тата Энĕшпуçĕнчи вăтам шкул «снайперĕсем» пĕрремĕшпе иккĕмĕш вырăнсене пайланă. 87 очкопа Киввăрмарсем виççĕмĕшсем пулнă. Тĕп шкулсем хушшинче Урнарсем маттурлăхпа палăрнă, 87 очкопа пĕрремĕш вырăна тухнă. Кĕлкешсем - иккĕмĕшсем (83 очко). Арапуçсемпе Чулкассем вара 81-шер очко пухса - виççĕмĕшсем. Тĕл перекен уйрăм арçын ачасем хушшинче Урнар шкулĕнчи М.Власов 36 очкопа пĕрремĕш, А.Егоров (пĕрремĕш вăтам шкул, 35 очко) иккĕмĕш, А.Ефремов (Пинер шкулĕ, 33 очко) виççĕмĕш вырăна тухнă. Хĕр ачасенчен чи тĕл перекеннисем И.Семенова (Энĕшпуç, 30 очко), И.Краснова (пĕрремĕш шкул, 28 очко), К.Фомина (Урнар, 23 очко) пулнă. Патриотла, салтак юррисен конкурсĕ вокаллă-инструменталлă ансамбль, соло-вокал, автор юрри номинацисенче иртнĕ, пуринче те Г.Е.Егоров ячĕллĕ пĕрремĕш вăтам шкулти вĕренекенсем пĕрремĕшсем пулнă. Пысăк Енккассинчи кадет класĕ 2-мĕш вырăна тивĕçнĕ.