19 февраля 2010 г.
Çăварни ваттисемшĕн те, çамрăксемшĕн те, ача-пăчасемшĕн те питех те пысăк, çавăнăçлă çурхи уяв. Кăçал вăл çуркуннене килмерĕ пулин те, Эçпепесем çăварни эрнине тивĕçлĕн ăсатса ячĕç. Ялти хоккейистсем икĕ ушкăна пайланса вăй-халне шеллемесĕр тупăшрĕç. Ăмăртăва хак паракансене те çăмăл пулмарĕ, мĕншĕн тесен çĕнтерÿшĕн кĕрешекенсем те пĕринчен тепри маттур, тата курса тăракансем хавхалантарни те вăй хушать. Çулланса çитнĕ арçынсем те çамрăк юлташĕсенчен юласшăн мар тăрăшрĕç. Тăрăшни усăсăр пулмарĕ - 5:5 шутпа туслăх çĕнтерчĕ. Эпир, ăмăртăва хак парса тăракан хĕрарăмсем те, чăтса тăраймарăмăр, арçынсем выляса пĕтернĕ хыççăн икĕ ушкăна уйрăлса хоккейла вылярăмăр. Малалла уявра юрă-ташă, тĕрлĕ спорт вăййисем хуçаланчĕç: михĕпе сикесси, кăшăл витĕр тухасси, çунашка туртса чупасси... Вăйăра мала тухакансене приз вырăнне чейпе икерчĕ çитерчĕç. Шкул ачисем çăварни çинчен сăвă вуларĕç. Унтан катемпи çунтарса кăвайт урлă сикрĕмĕр. Чир-чĕр кайтăр тенĕ сасă таврара хаваслăн янăрарĕ. Юратакансен кунĕ пулнăран пĕр-пĕрне валентинкăсем парнелерĕмĕр, каçару ыйтрăмăр.
х х х
Спортра та маттур Эçпепесем. Пăр ларсанах хоккейла выляма пуçлаççĕ. Шкул ачисемпе студентсем анчах мар, çемьеллĕ 30-50 çулхи арçынсем те выляççĕ, 7-8 çулхи ачасене те коньки çинче курма пулать. Пăрне юртан тасатма та ÿркенмеççĕ, кĕреçе, шăпăр йăтса пăр çине васкаççĕ. Ялти хресчен (фермер) хуçалăхĕн пуçлăхĕ В.Яковлев техникăпа туллин усă курмаллине тĕпе хурса вĕсене тракторпа пăр çинчи юра тасатса пулăшать. «Пяточок» ларек тытакан В.Денисов пăрне моторлă пăчкăпа касса шыв кăларса парать, тасатнă пăр çине шыв сапса якатаççĕ. Канмалли кунсенче вара ял варринчи пăр кĕрлесе кăна тăрать. Хăйсем йĕркеленĕ командăсем хушшинче кăна вăйăсем ирттермеççĕ. Акă нумаях пулмасть пирĕн патĕнче Пинер ял тăрăхĕнчи хоккеистсен команди пулчĕ. Район шайĕнчи ăмăртусене хутшăнса ăсталăха ытларах туптама ĕлкĕрнĕ Пинерсем ку хутĕнче 7:3 шутпа çĕнтерме пултарчĕç. Кÿренмерĕç спортсменсем, хăнасене каялла пушă алăпа та ямарĕç. Ятлă çĕвĕçĕ И.Федорова вылянă чухне аллисем ан шăнччăр тесе алсиш çĕлесе парнелерĕ. Çак кунсенче Пинерсемпех тепĕр хут выляма палăртнă.
Тăван çĕршывăн хÿтĕлевçи кунĕ кунта Социализмла Ĕç Геройĕн, паллă ентешĕн С.Л.Лукин призĕсене çĕнсе илессишĕн шашка ăмăртăвĕсем ирттерме палăртнă. Турнира йĕркелекенĕ, укçа-тенкĕ енчен хавхалантарса пыраканĕ депутатсен район Пухăвĕн депутачĕ Л.Лукин.