19 февраля 2010 г.
Çакăн чухлĕ уяв пĕр куна килсе тухни тахçан та пĕрре çеç пулать. Çăварни ăсатни, Валентин кунĕ, Китайсен календарĕпе Çĕнĕ çул - пурте вĕсем кăçал февралĕн 14-мĕшне килчĕç. Анчах пурне те вĕсене çынсен йышĕпе, савăнăçлă шăв-шавĕпе «Раççей йĕлтĕр йĕрĕ - 2010» хупларĕ тесен йăнăш пулас çук.
Республикипе 38 пин ытла çын çак кун йĕлтĕр йĕрĕ çине тухма кăмăл тунă. Ăмăртăва йĕркелекенсем пĕлтернĕ тăрăх, хальччен кун чухлĕ физкультурник çак акцие хутшăнманччĕ-ха. Шупашкар хулинче 12 пин, Канаш хулипе районĕнче 2 пине яхăн çын йĕлтĕр çине тăнă. Пирĕн районта та сывă пурнăç йĕркине тытса пыракансем активлăхпа палăрчĕç. Малтан известь завочĕ пулнă, халĕ «АУРАТ», «Труд», «АРС» тулли мар яваплă обществăсем вырнаçнă территорире иртнĕ мероприятие 312 йĕлтĕрçĕ хутшăнчĕ, унсăр пуçне вуншар-вуншар куракан - ватти те, вĕтти те - пухăннă кунта. Спорт уявĕ çăварни эрнине ăсатнипе пĕрле килнĕ май, таврара савăнăçлă юрă янăрать, сивĕ çилĕ пит çăмартисене чĕпĕтесшĕн пулсан та, çур еннелле сулăна пуçланă хĕвел çурăмран кăштах ăшăтасшăн та.
12 сехет. Старта чи малтанах VIP-йĕлтĕрçĕсем - райадминистрацин ĕçченĕсем, организацисемпе учрежденисен ертÿçисем, район Пухăвĕн депутачĕсем тухаççĕ. Вĕсем хушшинче район пуçлăхĕ В.Кириллов, ЧР Патшалăх Канашĕн председателĕн çумĕ Г.Васильев. Ăмăртăва ертÿçĕсем хутшăнни, диктор Шупашкарти чупура 2014 çулта Сочире иртекен Олимпиадăна халалланă 2014 метрлă дистанцире райадминистраци ĕçĕсен управляющийĕ-организациллĕ ĕçсен пайĕн начальникĕ Н.Павлов иккĕмĕш вырăн йышăннине пĕлтерни çамрăксене татах та хавхалантарать.
Ушкăн хыççăн ушкăн старта тухать, пухăннисем вĕсене уçă сассисемпе хавхалантараççĕ, чупу дистанцийĕнчен аякрах та мар районти культура ĕçченĕсем юрăсем шăрантараççĕ. Пĕр сăмахпа, ăмăрту кăна мар, чăн-чăн савăнăçлă уяв. Тупăшу пынă вăхăтрах хăйсен дистанцийĕсенче мала тухнисене те чысласах пыраççĕ. VIP-чупура арçынсем хушшинче В.Данилов (Кĕлкеш), хĕрарăмсенчен Г.Архипова (Пысăк Енккасси) чи малтисем пулчĕç. Чи çамрăк йĕлтĕрçĕ Юля Хованская та (Вăрмар поселокĕ, 2006 çулта çуралнă) парнесемпе Хисеп грамотине тивĕçрĕ.
Ытти ушкăнри спортсменсен кăтартăвĕсем çакăн пек. 1998 çулта çуралнисем хушшинче Кĕлкешри С.Матвеева тата Тикашри Н.Ленский чи маттурисем пулчĕç. 1996-1997 çулсенче çуралнисенчен И.Власовпа С.Данилована (Кĕлкеш) çитекеннисем пулмарĕç. 1994-1995 çулсенче кун çути курнисенчен К.Линга (Чупай), Н.Шапеев (Тикаш) - пĕрремĕшсем. Ю.Николаев (Энĕшпуç), Т.Пугачева (Чупай) 1992-1993 çулсенче çуралнисем хушшинче мала тухрĕç. 30 çула çитичченхи хĕрарăмсенчен финиша чи малтан И.Николаева (Энĕшпуç) çитрĕ. 30-60 çулсенчисем хушшинчи тĕрлĕ ушкăнсенче Л.Аршинова, З.Маркова (Кивĕ Вăрмар), Н.Михайлова (Вăрмар поселокĕ), Т.Ашмарина (Кавал) пĕрремĕшсем пулчĕç. 30 çула çитеймен арçынсенчен Н.Данилов (Кĕлкеш) çĕнтерÿçĕ пулса тăчĕ. 30-79 çулхи арçынсенчен хăйсен ушкăнĕсенче А.Хованский, В.Васильев, Н.Михайлов (Вăрмар поселокĕ), пĕр тăван Валерийпе Виталий Федоровсем (Кивĕ Вăрмар) финиша чи малтан çитрĕç. Шкул командисене илес пулсассăн, вăтам шкулсем хушшинче Энĕшпуçсем, тĕп шкулсем хушшинче Чупайсем пĕрремĕшсем пулчĕç. Вăрмар хула тăрăхĕн команди вара тивĕçлипех «Спортпа чи туслă тăрăх» ята тивĕçрĕ. Кивĕ Вăрмарпа Кĕлкеш ял тăрăхĕсем иккĕмĕшпе виççĕмĕш вырăна тухрĕç.
Кĕскен каласан, ку ăмăрту спортăн хĕллехи тĕп уявĕ пулчĕ тесен те йăнăш пулас çук.