12 февраля 2010 г.
Эрне ЧР Президенчĕшĕн Н.Федоровшăн ĕçлĕ çул çÿревсемпе тата тĕл пулусемпе пуян пулнă. Февралĕн 8-мĕшĕнче вăл Раççей Правительствин Председателĕ В.Путин ертсе пынипе Ĕпхÿре Правительствăн регионсен аталанăвĕн ыйтăвĕсемпе ĕçлекен комиссийĕн Раççей Федерацийĕн субъекчĕсенче информаци технологийĕсене аталантарассине халалланă ларăвне хутшăннă. Унта Правительство членĕсем, тивĕçлĕ министерствăсемпе ведомствăсен ертÿçисем, çавăн пекех регионсемпе муниципалитет пĕрлĕхĕсен пуçлăхĕсем хутшăннă. Çав кунах Николай Васильевич Ĕпхÿре Пушкăртстанри чăваш наци культура пĕрлĕхĕсен активĕпе тĕл пулнă.
Ытлари кун Шупашкарти оперăпа балет театрĕнче Г.А.Ильенко ячĕллĕ «Элара» ăслăлăхпа производство комплексĕ 40 çул çитнине халалланă савăнăçлă уява та хутшăннă ЧР Президенчĕ. Кризиса парăнмасăр, йывăрлăхсене пăхмасăр ăнăçлă аталанакан предприяти коллективне праçник ячĕпе ăшшăн саламланă. Февралĕн 11-мĕшĕнче Раççейĕн «Россия 24» информаци каналĕн регионти эфирĕнчи «Президент сехечĕ» программăра Н.Федоров республикăна РФ Правительствин Председателĕ В.Путин килсе кайни, Ĕпхÿре чăваш диаспорин представителĕсемпе курнăçни, вырăнти хăй тытăмлăх ĕç-хĕлĕ, çĕршыври политика тытăмне çĕнетесси, Чăваш Енрен «справкăсăр республика» тăвасси татат ытти çивĕч ыйтусемпе калаçнă.
Программăна вырсарни кун, февралĕн 14-мĕшĕнче, 11 сехет те 10 минутра «Россия 1» телеканалăн регионти эфирĕнче тата Раççейĕн «Россия 24» информаци каналĕн регионти эфирĕнче 19 сехетре тепĕр хут кăтартĕç. Н.Федоров Президент калаçăвĕн аудиоçыравĕ Раççей радиовĕн регионти эфирне паян, февралĕн 12-мĕшĕнче, 18 сехет те 25 минутра тата февралĕн 13-мĕшĕнче 18 сехет те 35 минутра тухать.