09 февраля 2010 г.
Кăçал республикăра çавра датăсемпе çыхăннă пулăмсем чылай: Аслă Отечественнăй вăрçăри Çĕнтерĕве 65, Чăваш автономи облаçне туса хунăранпа 90 çул çитет. Çавăн пекех патшалăх влаç тытăмĕн те - Облĕçтăвкомпа Советсен пĕрремĕш съезчĕн - юбилей. Иртнĕ эрне кун 2010 çулта Республика кунне уявласа ирттерес ыйтупа ĕçлекен йĕркелÿ комитечĕн ларăвĕнче Н.Федоров Президент çак пулăмсем Республика кунне ирттернĕ чухне тивĕçлĕ вырăн йышăнмалли çинчен каланă.
Республика кунĕнче юлашки вăхăтра хута янă тата строительство ĕçĕсем кĕçех вĕçленекен объектсем - «Трактор завочĕсем» концернăн «Промтрактор - Вакун» АХО çĕнĕ вакунсем кăларакан производстви, Сĕнтĕрвăрри тата Çĕрпÿ хулисенчи физкультурăпа сывлăх комплексĕсем, патшалăх тата муниципалитет пулăшăвĕ паракан нумай функциллĕ центр тата ыттисем - республика аталанăвĕшĕн ĕçленине кăтартса парĕç. Республика кунĕ сумлă çĕнĕлĕх тата чылай парнелĕ. «Раççей - 2010 - 2020: кризис хыççăнхи управлени, тытăм улшăнăвĕсен аталанăвĕ» темăпа иртекен 3-мĕш экономика форумĕ иртĕ. Халăх пултарулăхĕн Пĕтĕм Раççейри XVIII «Раççей çăлкуçĕсем» фестивалĕ уявăн тĕп саманчĕсенчен пĕри пулĕ. Шупашкарта çавăн пекех Пĕтĕм Раççейри VIII «Руç ăстисем» конкурс малалла тăсăлĕ. Тĕрĕ тĕрлекенсем, йывăçа касса эрешлекенсем, тăм тетте тăвакансем, ытти ăста хăйсен пултарулăхĕпе паллаштарĕç, Чăваш Ен Президенчĕн призне çĕнсе илессишĕн тупăшĕç. Уяв хăнисене Шупашкарсăр пуçне Патăрьел районĕ те хапăлласа кĕтĕ.