09 февраля 2010 г.
Çĕрпÿри çак пилĕк хутлă çурта «Хĕрлĕ ялав» хаçат редакцийĕн ĕçченĕсем лайăх пĕлеççĕ. Район хыпарçи кунти издательствăра пичетленнĕ май час-часах кÿршĕ район «тĕп хулине» тухса çÿреме тивнĕрен, вăл пирĕн куç умĕнчех хăпарчĕ. Акă, иртнĕ эрнере унта ЧР Президенчĕ Н.Федоров пулса чаплă лару-тăрура аграрипе технологи техникумĕн çĕнĕ вĕренÿ корпусĕ уçăлни çинчен пĕлтерчĕ.
Вĕрентÿ корпусне 1992 çултах тума пуçланă. 18 çул хушшинче тĕп подрядчик улшăннă. Строительствăна малалла тăсма Шупашкарти «Чĕрĕлÿ» корпораци килĕшнĕ, ĕçе вăл вĕçленĕ. Объекта тума 2005 çулччен федераци бюджетĕнчен 15 миллион тенкĕ уйăрнă. 2006 çултан пуçласа республика бюджетĕнчен 65,2 миллион тенкĕ килнĕ.
Техникумра хальхи вăхăтра 985 вĕренекен, çав шутра çĕнĕ корпусра пĕр харăсах 360 студент пĕлÿ илет. Кунта çĕвĕçсене, закройщиксене, тумтир ăстисене, çĕвĕ техникин операторĕсене, каменщиксене, механиксене хатĕрлеççĕ. Тĕпрен илсен вĕренекенсем хамăр республикăран.
Н.Федоров вĕрентÿ класĕсемпе паллашнă май студентсемпе калаçу йĕркеленĕ, «çавра сĕтелте» вĕсен ĕç-хĕлĕпе паллашнă. Çĕвĕç профессине алла илекенсем тĕрлĕ ыйтусемпе кăсăкланнă. Çав шутра «Çамрăк çемье» программа мĕнле ĕçлени, ĕç укçине ÿстересси, йăлари тата промышленноçри каяшсене пуçтарса тирпейлемелли полигонсем тăвас ĕç мĕнле пулса пыни тата ытти те. Президент пур ыйту çине те хуравланă, техникум валли çĕнĕ оборудовани туянма 734 пин тенкĕлĕх сертификат парнеленĕ.