05 февраля 2010 г.
РФ Президенчĕ Д.Медведев январĕн 22-мĕшĕнче Патшалăх Канашĕн ларăвĕнче çĕршыври политика системине аталантарасси пирки тухса калаçрĕ. Унăн ĕçне Патшалăх Думине лекме пултарнă партисем кăна мар, регионсен пуçлăхĕсемпе ытти пысăкрах партисен представителĕсем те хутшăнчĕç.
- Пирĕн тĕллев, - палăртрĕ унта Д.Медведев Президент, - политика управленийĕнче нумай енлĕ обществăн пур ыйтăвĕсене те май килнĕ таран шута илесси.
Çакă вара парламентри партисен шухăшне шута илнипе çеç тулли енлĕн пурнăçланаймасть. Çавăнпа та Дмитрий Анатольевич вырăнти влаç органĕсен пур парти уйрăмĕсемпе çыхăнса ĕçлемеллине те каларĕ. Йывăр социаллă ыйтусене шутласа çитереймен административлă мелсемпе кăна татса парасси валли те вырăн пулмалла маррине пĕлтерчĕ. Çавăнпах ĕнтĕ çĕршывра политика системи ĕçлет пулин те, вăл мĕнле пулмаллинчен аяккарах пулнине, пурăна киле политикăна хăш-пĕр улшăнусем кĕртме тивнине палăртрĕ.
Раççей гражданĕсене влаç тытăмĕнче коррупци тымар яни пăшăрхантарать, судсем те хăш-пĕр чухне пăхса тухакан ĕçсем çине çиелтен пăхаççĕ. Пытарма кирлĕ мар, хальхи вăхăтра нумай çын укçа ĕçлесе илес тĕллевпе пысăк хуласене тухса çÿрет. Милици сотрудникĕсем вара, хÿтĕлес вырăнне, вĕсенчен укçа-тенке туртса илеççĕ. Пур милици сотрудникне те айăплама кирлĕ мар, паллах, анчах халăх хушшинче социологи ыйтăмĕ ирттернĕ тăрăх, вĕсен рейтингĕ пĕчĕк-ха. Граждансен прависене уяманни те куç кĕрет. Пĕр тĕслĕхпе кăна çирĕплететĕп. Нумаях пулмасть мана ГИБДД сотрудникĕсем чарчĕç. Правасене ăнлантармасăрах çул-йĕр правилисене пăснă тесе протокол çырчĕç. Кайран хăйсем суда та килмерĕç. Паллă юрăçпа Ю.Антоновпа та çак тытăмри ĕçченсемпе хирĕçÿ пулса иртнĕччĕ.
Çакна калас килет - чылай ĕçе çĕнĕлле йĕркелесси пирки калаçатпăр, анчах та ăна хамăртан пуçламаллине те манас марччĕ. Вара тин ахаль çынсемпе административлă е урăх тытăмра ĕçлекенсем пĕр-пĕрне илтме пуçлĕç, обществăра курăмлă çитĕнÿсем пулĕç.