02 февраля 2010 г.
Вĕрентекен... сăваплă сирĕн ят!
Парсамăр ирĕк пуçăма таймашкăн.
Эсир чĕртейнĕ чĕремри кăвар,
Çук, чарăнмĕ нихçан та ялкăшмашкăн.
Çак сăвă йĕркисем Кĕтеснерти пĕтĕмĕшле пĕлÿ паракан тĕп шкулта 29 çул хушши вăй хуракан М.Краснова пиркиех тесен те йăнăш пулмĕ.
Канашри педагогика училищине вĕренсе пĕтернĕ хыççăн шăпа Маргарита Вячеславовнана тăван яла илсе çитерет. Кĕçĕн класри ачасене пĕлÿ тата воспитани парас ĕçре вăй хурать, çав вăхăтрах И.Н.Ульянов ячĕллĕ Чăваш патшалăх университетĕнче историпе филологи факультетĕнче куçăмсăр майпа пĕлĕвне ÿстерет. Унтан шкулта историпе географи предметне вĕрентме тытăнать. Директорăн воспитани енĕпе ĕçлекен заместителĕнче пысăк яваплăха туйса тăрăшать. 2003 çултанпа Кĕтеснер шкулĕн коллективне ертсе пырать.
Хастар та пултаруллă педагог вĕрентÿри çĕнĕ хум варкăшне пурнăçа кĕртме тăрăшать. Историпе право урокĕсем тĕрлĕ енлĕхĕпе уйрăлса тăраççĕ. Унăн вĕренекенĕсем районта иртекен конкурссенче малтисен ретĕнче. Кăçалхи вĕренÿ çулĕнче 9-мĕш класра вĕренекен Маргарита Сергеева право предмечĕпе 1-мĕш вырăна тивĕçрĕ.
Вĕрентекен аслă пĕлÿллĕ, диплом илнĕ çын тенине кăна пĕлтермест. Учитель профессине кирек кам та алла илме пултарсан та унран мĕнле специалист пуласси пĕлÿрен мар, çынран хăйĕнчен килет. Маргарита Вячеславовнан амăшĕ те, Екатерина Дмитриевна, математика вĕрентекенĕ пулнă май, ачасене сасă хăпартмасăр, ятламасăр итлеттерме, вĕсен кăмăлне уçма пултарнă. Унăн хĕрĕ амăшне хывнă та ĕнтĕ. Кашнинех ăнланма, кирлĕ сĕнÿ-канаш парса лăплантарма пĕлет. Тепĕр чух çывăх çыннисем парса çитереймен чун ăшшине те пама тăрăшать. Ашшĕ-амăшĕ вырăнне çирĕппĕн асăрхаттарма, ятлама та пултарать ăста педагог.
Ырă кăмăлĕшĕн, çынна ăнланнишĕн хисеплеççĕ ăна ĕçтешĕсемпе вĕренекенĕсем. Паянхи кун та Маргарита Вячеславовнана вĕренекенĕсем тав сăмахĕ калаççĕ, салам çырăвĕсем яраççĕ. Тăван ял-йыш, ачасен ашшĕ-амăшĕсем умĕнче те сумлă çын Маргарита Вячеславовна.
Юратнă мăшăрĕпе, Виталий Вячеславовичпа, икĕ хĕр çитĕнтереççĕ. Аслă хĕрĕ - Татьяна - Тольятти хула сучĕн судья çумĕ пулса ĕçлет, кĕçĕн хĕрĕ шкулта вĕренет.
Маргарита Вячеславовна - Раççей Федерацийĕн пĕтĕмĕшле тата профессилле вĕрентĕвĕн тава тивĕçлĕ ĕçченĕ.