22 января 2010 г.
Вырăнти влаçăн чи малта тăракан задачи - граждансемпе яланах тата тĕрлĕ енлĕ хутшăнса ĕçлесси, вăл вырăнти çăмăл мар ыйтусене татса пама тивĕç тата татса пама пултарать те. Çынсем вырăнти влаçа ĕненеççĕ, шанаççĕ, пулăшу кĕтеççĕ.
Райадминистрацине тăтăшах килсе тăракан çырусем те çакна çирĕплетсе параççĕ. Акă, иртнĕ 2009 çулта райадминистрацине граждансенчен 205 çыру пырса кĕнĕ. Çырусем ытларах Вăрмар хула тăрăхĕнчен, çавăн пекех Арапуç, Кавал, Пысăк Енккасси тата Чупай ял тăрăхĕсенчен килнĕ. Корреспонденцисенчи ыйтусене татса пама ытларахĕшĕсене райадминистрацинчи пайсене, хăшĕ-пĕрисене ытти ведомствăсене ярса панă. Çырусенче граждансем сывлăх сыхлав, финанс, суту-илÿ, экологи, çутçанталăкпа усă курас, вĕрентÿ, халăхăн йăла ыйтăвĕсене тивĕçтерес, социаллă пулăшу, ял хуçалăх ыйтăвĕсене тапратнă. Иртнĕ çулхипе танлаштарсан коллективпа çырнă çырусен шучĕ тата анонимлă (харпăр-хăйне палăртмасăр) çырнисем чакнă. Вăрçă тата ĕç ветеранĕсене, ĕçе пула инвалида тухнисене тата ыттисене те тĕрлĕрен ыйтусем кăсăклантараççĕ.
Раççей Федерацийĕнче тата хамăр республикăра тĕрлĕ вырăнта пурăнакансенчен 16 çыру килнĕ. Пĕри пурте усă куракан информаци системипе хăйĕн ыйтăвне татса пама ыйтнă.
Район пуçлăхĕпе В. Кирилловпа хăйпе куçа-куçăн 64 çын курса калаçнă.
Çырупа тухнă тата тĕл пулнă çынсен ыйтăвĕсене пурне те тивĕçлĕ хуравсем, кирлĕ канашсем панă.