15 января 2010 г.
Нумай çул тăрăшса вăй хураканшăн юбилей вăл хăйне евĕрлĕ пĕтĕмлетÿ. Çын ĕçре пиçĕхет, текен ваттисен каларăшĕ паянхи кун та пĕлтерĕшлĕ. «Халăхăн социаллă ыйтăвĕсемпе ĕçлекен Вăрмарти центр» республикăри патшалăх учрежденийĕнче директорăн заместителĕнче вăй хуракан Галина Даниловна Чернова пирки те çакнах каламалла. Вăл 1955 çулхи январĕн 19-мĕшĕнче Хĕрлĕçыр ялĕнче çуралнă. 1972 çулта Шăхальти вăтам шкула вĕренсе пĕтерсен тÿрех ĕçе кÿлĕннĕ. 6 çул Г.Чернова Çĕнĕ Шупашкарти пĕр лавккара контролер-кассир пулса тăрăшать. Тăван ен çамрăк хĕре хăйĕн патнех туртать. 1983 çулта пултаруллă çамрăк «Тегешевский» совхозра секретарь пулса вăй хурать, унтан «Сельхозэнерго» предприятинче кадрсем енĕпе ĕçлекен инспектор пулса ĕçлет. 2001 çулта районти пенси фондĕнче тĕп специалистра вăй хума тытăнать. Ĕçре пысăк ÿсĕмсем тунăшăн Хисеп грамотисемпе хаклă парнесене чылай тивĕçнĕ вăл. Тĕрлĕ ĕçсенче тăрăшнипе пĕрлех пĕлĕве ÿстерес тĕллев те пуçран тухман унăн. Çавна май 1996 çулта Г.Чернова Челябинскри юридици техникумне вĕренме кĕрет. Унтан вĕренсе тухса алла диплом илсен Мускаври социаллă патшалăх университетне куçăмсăр майпа вĕренме кĕрет. Асăннă университета та ăнăçлă вĕренсе пĕтерет. 2005 çултан пуçласа паянхи кунччен «Халăхăн социаллă ыйтăвĕсемпе ĕçлекен Вăрмарти центр» республикăри патшалăх учрежденийĕнче директорăн заместителĕнче ĕçлет. Профессиллĕ ăсталăхĕпе, организаторла пултарулăхĕпе палăрса тăрать теççĕ ун пирки ĕçтешĕсем. «Аслă пĕлÿллĕ, дисциплинăна çирĕп пăхăнакан, яваплăха туйса пурнăçлакан ĕçчен вăл Галина Даниловна», - тет Ж.Дмитриева пуçлăх ĕçтешĕ çинчен сăмах пуçарнă май. «Тĕрлĕ проблемăллă ыйтусене эпир яланах пĕрле татса пама тăрăшатпăр», - палăртать вăл.
Пăхатăп та Галина Даниловна çине, унра вăй-хăват тапса тăрать, пултарулăхĕ иксĕлми. Çакăн пек пулма ăна мăшăрĕпе ачисем хавхалантарса пыраççĕ. Мăшăрĕпе В.Черновпа пĕрле икĕ ача çитĕнтерсе пурнăçăн анлă çулĕ çине кăларнă. Икĕ ачи те аслă пĕлÿ илнĕ. Сергей ывăлĕ Мускаври автотранспорт предприятинче тĕп бухгалтерта, хĕрĕ Татьяна Шупашкарта Суд департаменчĕн Управленийĕнче аслă специалист пулса вăй хураççĕ. Хĕрарăм вăй-халлă, пултаруллă, маттур пулсан çемье вучахĕ нихăçан та сÿнмест. Галина Даниловна пирки те çакнах каламалла. Юбилей çывхарса килнĕ май кĕреки тус-тăванран, сĕтелĕ çăкăр-тăвартан ан татăлтăр, чунри хĕлхем ан сÿнтĕр нихăçан.