15 января 2010 г.
Çамрăкла пĕр суйласа илнĕ ĕçпе ĕçлекенсем пирки хаçатра çырсах тăратпăр эпир. Анчах кулленхи пурнăçра ĕмĕрĕпех ăна парăннисем, килĕшĕр те, нумаях мар. Вĕсенчен пĕри - Кивĕ Вăрмар ялĕнче çуралнă, халĕ Вăрмарти «Теплосеть» муниципаллă унитари предприятийĕнче мастерта вăй хуракан Николай Андреевич Семенов. Хăйĕн ĕç биографине вăл ялти 8 çул вĕренмелли шкула пĕтерсен Шупашкарти агрегат заводĕнче слесарь пулса пуçланă. 1973-1975 çулсенче çар ретĕнче тăнă хыççăн «Канашская» куçса çÿрекен механизациленĕ колоннăн Вăрмарти прораб участокĕнче вăй хума тытăннă, çавăнтах электрогазосварщик профессине алла илнĕ те сварка агрегатĕнчен, ытарлă каласан, паян кунччен уйрăлмасть. Унтанпа ĕç вырăнĕ те улшăннă, карьера картлашкипе те çÿлелле хăпарнă (халĕ вăл - «Теплосеть» системинче ăшă валеçекен пунктсемпе узелсен мастерĕ), анчах унта е кунта сварщик ĕçĕсене пурнăçламалла пулсассăн, хăйне пысăка хумасть, мĕн çамрăкран хăнăхнă ĕçе пĕлсе те хăвăрт тăвать. Тăван предприятийĕнче ăста та пултаруллă сварщиксем çук мар, апла пулин те хăв тума пултаракан ĕçе мĕншĕн ыттисем пурнăçласса кĕтмелле; Хуçалăхĕ те пĕчĕк мар çав - пăрăхсен тăршшĕ кăна 14 çухрăма яхăн тăсăлать. Поселокри пур организацисемпе предприятисене, учрежденисене, кашни хваттерех тенĕ пек вĕсем ăшă çитереççĕ-ха та.
Коллективра хисеплĕ çын Николай Андреевич, ĕçне пĕлсе тунипе пĕрлех ваттипе ватăлла, çамрăккипе çамрăкла пулма пĕлни те ят-сума ÿстерет. Тĕрлĕ çĕртен панă Хисеп грамотисен шутне те маннă пулĕ ăста. Вĕсенчен чи сумли ЧР Хула строительствипе обществăлла инфратытăм аталанăвĕн министерствин грамоти тесе шутлать. Ара, коммуналлă тытăмри ĕçченсен ĕçне ăçта ытларах пĕлсе хаклĕç тата; Наградăсем тенĕрен, 7 ачаллă çемьере çитĕннĕскер, пĕчĕкренех тăрăшуллă пулнă. 1970 çултах вăл вĕренÿри çитĕнÿсемшĕн В.И.Ленин çуралнăранпа 100 çул çитнине халалласа кăларнă юбилей медальне тивĕçнĕ.
Юратнă мăшăрĕпе, Любовь Михайловнапа, 33 çул килĕштерсе пурăнаççĕ. Вăл Вăрмарти çĕвĕ фабрикин столовăйĕнче повар пулса тăрăшать. Икĕ ывăла, Эдуардпа Алексее, пурнăç çулĕ çине кăларнă. Иккĕшĕ те Тверь хулинче тĕпленнĕ, çемьеллĕ. Инçетре пурăннине пула тăван киле час-часах килсе çÿреймеççĕ пулин те, ашшĕн юбилейне (Николай Андреевич хăйĕн 55 çулне январĕн 16-мĕшĕнче паллă тăвать) çитсе ăна ăшшăн саламлама хатĕрленеççĕ. Вĕсем мĕн суннине пĕлместпĕр те, эпир вара çирĕп сывлăх, чунпа яланах çамрăк пулма сунатпăр.