12 января 2010 г.
Çын ĕçпе чапа тухать, ĕç çынна илемлетет, тенĕ ĕлĕкех халăхра. Çак чапа тивĕçлĕ те ĕнтĕ «Чăвашсетьгаз» АУОн «Куславккамежрайгаз» филиалĕн Вăрмарти газ участокĕнче тĕп инженер пулса ĕçлекен Алексей Иванович Романов.
Пĕтĕм хăйĕн пултарулăхĕпе пĕлĕвне поселокпа районти ялсене çут çанталăк газĕпе тивĕçтерес тесе парать çак хĕрÿ чĕреллĕ ĕçчен. Нумаях пулмасть вăл хăйĕн çур ĕмĕрхи юбилейне палăртнине пĕлсен, ун çинчен кĕскен те пулин хаçат урлă çырас терĕмĕр. ЧР Президенчĕн 2003-мĕш çулхи «Чăваш Республикин ялĕсене газ кĕртессине вĕçлесси çинчен» Указне пурнăçласа ĕç вăхăчĕ миçере пуçланса, миçере пĕтнĕ-ши унăн - канмалли кунсене те пăхса тăман пулĕ, районти бригадăпа хăвăртрах ĕçлес тесе.
Кирек мĕнле ĕçре те сăкăлтăксăр пулмасть. Çут çанталăк газĕпе усă курнă чухне те килсе тухма пултараççĕ вĕсем, çавăнпах пуль Алексей Иванович район хаçатĕнче те час-часах халăха газпа усă курмалли йĕркепе паллаштарнă тĕслĕхсем те нумай. Çынна май пур таран пулăшма хатĕр пулни те хисеп туйăмĕ çуратать халăхра. Мĕншĕн ăшă сăмах хушас мар ырă кăмăллă çын çинчен, теççĕ ун юлташĕсем ĕçре. Çемьере те мăшăрĕпе туслă, шăкăл-шăкăл калаçса пурăнса икĕ хĕрача ÿстерсе çитĕнтереççĕ вĕсем.
«Çын мĕншĕн çуралса пурăнать», - тесе ыйтсан та, вăл яланах: «Ырă ĕç тума», - тесе хуравлать. Ырă ĕç тени вăл - хăй тивлет. Çак ĕмĕт-шухăшсемпе пурăнать те ĕнтĕ пирĕн ĕçтеш.