12 января 2010 г.
Чăвашпотребсоюз кашни çулах Çĕнĕ çул ячĕпе «Ачасене - пылак çимĕçсем» ятпа акци ирттерет. Çавна май Вăрмар райповĕн ĕçченĕсем çак акцие кашни çулах хутшăнаççĕ. Акă ку хутĕнче те вĕсем çул çитмен ачасен реабилитаци центрне çитсе кунти çамрăк ăрăва Çĕнĕ çул ячĕпе саламларĕç. Райпо канашĕн председателĕ, РФ Патшалăх Думин депутачĕн Н.Бударинăн пулăшуçи К.Никитин, «Единая Россия» партин районти уйрăмĕн ĕç тăвакан комитечĕн ертÿçи И.Иванов, райпо канашĕн профсоюз председателĕ Н.Семенова ачасене пылак çимĕçсем парнелерĕç.
«Ачасене - пылак çимĕçсем» акцие райпо ĕçченĕсем пур кăмăлпа хутшăнаççĕ. Кунта тăрăшса вăй хуракансем ачасем валли пылак çимĕçсем хатĕрлеççĕ. Вĕсене эпир ăнăçсăр çемьесенчи, реабилитаци центрĕнчи ачасене, Ваттисен çуртĕнче пурăнакансене Çĕнĕ çул ячĕпе саламласа паратпăр. РФ Патшалăх Думин депутачĕн Н.Бударинăн пулăшуçи пулнă май, сире, çамрăксем, тĕнчипе паллă космонавт тата райпо ĕçченĕсен ячĕпе çак паллă уявпа саламлатăп, ÿссен çĕршыва юрăхлă граждансем пулма çирĕп сывлăх, мирлĕ пурнăç, лайăх вĕренме, Н.Бударин космонавт пек маттур пулма ăнăçу сунатăп», - терĕ Константин Владимирович. Çавăн пекех «Единая Россия» партин районти уйрăмĕн ĕç тăвакан комитечĕн ертÿçи И.Иванов реабилитаци центрĕнчи ачасене Çĕнĕ çул ячĕпе саламларĕ, вĕренÿре, спортра маттуррисен йышĕнче пулма çирĕп сывлăх сунчĕ. Унтан ачасем килнĕ хăнасене парнесемшĕн тав турĕç, юрă-сăвă шăрантарчĕç.
Çакна палăртмалла: Вăрмар райповĕ йывăр лару-тăрура ÿсекен çемьери ачасене тимлĕх уйăрнипе пĕрлех райпо системинче тăрăшакансен ачисене те кашни çулах Çĕнĕ çул ячĕпе саламлать. Çавна май 150 ача пысăк парнесене тивĕçрĕ. Унсăр пуçне Чăвашпотребсоюз тата потребкооперацин республикăри профсоюзсен комитечĕ ачасене халалласа Чăваш патшалăх академи драма театрĕнче Çĕнĕ çул уявĕ ирттернĕ. Унта пирĕн районти потребкооперцинче вăй хуракансен хĕр ачисемпе арçын ачисем 10 хутшăннă.