01 января 2010 г.
Çĕнĕ çула Вăрмар райповĕ лайăх кăтартусемпе кĕтсе илет. Унăн хăш-пĕр отраслĕ иртнĕ çулхинчен тухăçлăрах ĕçленĕ. Райпон 53 суту-илÿ предприятийĕ, «Çăкăр завочĕ», «Нива», «Обществăлла апатлану предприятийĕ» тулли мар яваплă обществăсем вăйланса пыракан конкуренцире те тивĕçлипе тупăшма пултараççĕ. Халăх потребительсен обществин лавккисене, кафе-столовăйне çÿрет, унăн предприятийĕсем кăларакан продукцие туянать пулсан - хăйшĕн тăрăшнине хаклама пĕлет.
- Эпир районта пурăнакансене куллен кирлĕ мĕн пур таварпа тивĕçтерес тĕллевпе ассортимента пуянлатсах пыратпăр, пахалăхпа тимлĕ ĕçлетпĕр. Çавăн пекех сутуçăсен, ытти ĕçченсен халăхпа хутшăнас культурине ÿстерес, туянакана пахалăхлă таварпа тивĕçтерес тĕлĕшпе сахал мар тăрăшатпăр, - тет райпо канашĕн председателĕ К.Никитин. Вăл потребкоопераци тытăмĕнче 20 çул ытла тăрăшса вăй хурать. Хăй Хусанти финанспа экономикăн бухучет тата Шупашкарти коопераци институчĕн юриспруденци факультечĕсене вĕренсе пĕтернĕ. Опытлă, шанчăклă, пуçаруллă, йывăрлăхсене çĕнтерсе хуçалăха çирĕп тытса пыракан пуçлăха «Потребкооперацинче 20 çул тÿрĕ кăмăлпа тăрăшса вăй хунăшăн» знакпа наградăланă. Вăл çавăн пекех ЧР Патшалăх Канашĕн, РФ Центросоюз, Чăвашпотребсоюз Хисеп грамотисене тивĕçнĕ. Районти потребкооперацине ÿсĕм çулĕпе илсе пынăшăн пултаруллă пуçлăха юбилей ячĕпе Раççейĕн никама пăхăнман профсоюзсен Федерацийĕн «Туслăхшăн» знакпа чысланă. Константин Владимирович çавăн пекех «Чăваш Республикин халăх ыйтăвне тивĕçтерессин тава тивĕçлĕ ĕçченĕ» хисеплĕ ята тивĕçнĕ. Вăл РФ Патшалăх Думин депутачĕн Н.Бударинăн пулăшуçи.
Ертÿçĕне кура ĕçченĕсем те яваплăха тĕп вырăна хураççĕ, ÿсĕмсемшĕн тăрăшаççĕ. Суту-илÿ енĕпе тавар çаврăнăш планне иртнĕ çулхипе танлаштарсан çак лавккасем чылай ирттерсе тултарнă: поселокри «Колос», «Надежда», «Спутник», Кивĕ Вăрмарти, Чулкасри, Кавалти лавккасем. Ыттисен кăтартăвĕсем те пĕлтĕрхинчен тухăçлăрах пулнине палăртмалла. Общество апатланăвĕнче «Вăрмар», «Юмах» кафесем, кулинари лавкки малта пыраççĕ. Хатĕрлев ĕçне те палăртмалла. Потребительсен обществи халăхран 20 тĕрлĕ ял хуçалăх продукцийĕпе чĕр тавар пухать. Какай, сĕт, çĕр улми, пахча çимĕç, эмел курăкĕсем, тир нумайрах хатĕрлеме пуçланă. Ял халăхне хăйсен предприятийĕсем кăларакан продукципе тивĕçтерес тĕлĕшпе те чылай тăрăшаççĕ. Ку лавккасенчи ассортимента пуянлатма, тавар çаврăнăшне кирлĕ шайра тытса тăма пулăшать. «Вăрмарти çăкăр завочĕ» тулли мар яваплă общество ăстисем пĕçерекен çăкăр-булкăна, сухари-сушкăна районта пурăнакансем кăмăлласа туянаççĕ. Çăкăр заводĕнче паян паха продукци кăларма условисем çителĕклĕ. «Ротор-Агро» кăмакапа ĕç процесĕ чылай çăмăлланнă. Паха технологисене ĕçе кĕртме май паракан хăватлă оборудованипе продукци ытларах хатĕрлеме тăрăшаççĕ. Халăх ыйтăвĕсене шута илсе çĕнĕ йышши апат-çимĕç кăларас тĕлĕшпе сахал мар тăрăшнине палăртмалла. Кондитер, пылак шыв, пулă тăварлакан цехсен продукцийĕ пирки те ыррине çеç илтме пулать. Пахалăхĕ районта пурăнакансене çеç мар, ытти тăрăхри тавар туянакансене те тивĕçтерет.
Республика кунне тивĕçлĕ шайра кĕтсе илессипе чылай тăрăшнă райпо ĕçченĕсем. Акă поселокри «Колос», «Надежда» лавккасене, «Юность» кафене, «Меркурий», «Минутка» буфетсене, Чулкасри райпо лавккине çĕнĕ сăн кĕртнĕ. Пурлăхпа техника никĕсне çирĕплетме укçа-тенкĕ хĕрхенмеççĕ. Темиçе лавкка валли çĕнĕ суту-илÿ оборудованийĕ туяннă.
- Çĕнĕ çула пархатарлă тĕллевсемпе кĕтсе илме хатĕрленетпĕр. Тăрăшсан - ÿсĕм пулатех. Йăлтах хамăртан, коллективри кашни çын мĕнле тăрăшнинчен килет. Пирĕн коллектив туслă, çирĕп. Çавăнпа та 2010 çулта аталану çулĕпе тата сулмаклăрах утасса шанатăп, - çирĕплетет К.Никитин. Апла пулсан райпо малалла та ăнтăлу çулĕпе пырĕ.