01 января 2010 г.
РФ Президенчĕ Д.Медведев, ЧР Президенчĕ Н.Федоров Раççейре те, Чăваш Енре те 2010 çул Вĕрентекен çулталăкĕ пулни çинчен пĕлтерчĕç. Пирĕн районта çак тĕлĕшпе райадминистрацин вĕрентÿпе çамрăксен политикин пайĕ чылай ĕç туса ирттерме палăртнă.
Вĕрентекен çулталăкĕ официаллă уçăлни çинчен педагогика ĕçченĕсен канашлăвĕнче пĕлтерĕç, çавăнтах «Çулталăк учителĕ», «Ачасен Вăрмарти ÿнер шкулĕнчи чи лайăх вĕрентекен», «Районти чи лайăх шкул», «Вĕрентÿре малта пыракан», воспитательсем хушшинче иртекен «Çынна чăн-чăн çын тăвасси», «Чĕрене ачасене паратăп» районти тата республикăпа федераци шайĕнчи конкурссем çинчен калĕç. Тĕрлĕ конференци-дискуссисем те иртĕç кăçал: республикăра çĕнĕлле ĕçлекен учительсен форумĕ, вĕрентекенсен ĕçне çĕнĕлĕхсем кĕртесси пирки дискусси, вĕрентÿ шайне çÿлĕрех шая çĕклес енĕпе туса ирттермелли ĕçсем пирки конференци, професси ыйтăвĕсемпе çыхăннă çавра сĕтелсем тата ытти тĕрлĕ мероприятисем. Çавăн пекех Интернет «карти» вĕрентекенсене Çĕнĕ çулта çĕнĕ вăйпа хăйсен блогĕсен конкурсне йыхравлать.