26 декабря 2009 г.
И мĕн пуян, тăванăм?
Сывлăх пуян.
Сывлăх çул памасăр ăçта каян?-
тесе çырнă Митта Ваçлейĕ. Сывлăх пуян! Мĕн тери паха сăмахсем, мĕншĕн тесен сывлăхсăр телей те пулмасть, ĕç те ăнмасть, кăмăл та сÿрĕк, пурнăç та тĕксĕм. Сывлăх, апла пулсан, çĕр çинчи чи хаклă пуянлăх. Çак шухăша çирĕплетсе Пысăк Енккассинчи вăтам шкулта ашшĕ-амăшĕсен пухăвне ирттерчĕç. Пухăва шкулти агитбригада хатĕрленĕ «Сиенлĕ йăласем» литмонтажпа пуçларĕç. Ачасен сывлăхĕ çирĕп пуласси ашшĕ-амăшĕсенчен те, шкулта вĕрентекенсенчен те, ачасенчен хăйсенчен те килнине палăртса биологи предметне вĕрентекен Т.Табакова «Сывлăхлă пулас тесен» ятлă кинофрагментпа паллаштарчĕ. Ачасен сывлăхĕ ан хавшатăр тесен ашшĕ-амăшĕсен тимлĕ пулмаллине палăртрĕ, мĕншĕн тесен ачасене ирхине апат çитерсе ярасси вĕсен тивĕçĕ. Ачан канупа вĕренĕвĕн режимне йĕркелеме те, вăл сĕтел хушшинче тĕрĕс ларнине вăхăтра асăрхама та, компьютер умĕнче ытлашши нумай ларнипе куçсем ывăннине асăрхаттарма та вĕсен тăрăшмалла. Ача урокра мĕнле ĕçлени, унăн кăмăлĕ еплерех пулни чи малтанах сывлăхран килет тесе вĕçлерĕ Татьяна Рудольфовна. Вĕрентÿ енĕпе ĕçлекен Л.Дзюба та хăйĕн калаçăвĕнче сывлăхлă ача çеç пур çĕре те хутшăнма, пур енлĕн аталанма пултарнине палăртса хăварчĕ. Сывлăхлă, çирĕп халлă ачасем конкурссенче те, ăмăртусенче те маттур пулнине çирĕплетсе ятран каларĕ. Вĕсем: Т.Степанова (11 кл.), А.Петрова (10 кл), М.Николаева (10 кл.) И.Петров (9 кл.), И.Леонтьев, В.Вишневский, А.Викторова, Г.Русскова (8 кл.), Ю.Иванова (4 кл.), М.Александрова, О.Иванова (3 кл.) тата ыттисем те. Çыншăн - чи кирли сывлăх, апла пирĕн ăна упрамалла.