05 декабря 2009 г.
Нумаях пулмасть Мускавра Пĕтĕм Раççейри çамрăксен «Раççей студентсен отрячĕсем» общество юхăмĕ слет ирттернĕ. Ăна студентсен отрячĕсен юхăмĕ 50 çул тултарнине халалланă. Унта Чăваш Ен делегацийĕ те хутшăннă - 36-ăн. Çак йышра - студентсен отрячĕсен командирĕсемпе комиссарĕсем, регионти штаб ертÿçисем, асăннă юхăм ветеранĕсем.
Студентсен отрядне 1958 çулхи ноябрĕн 14-мĕшĕнче М.В.Ломоносов ячĕллĕ Мускав патшалăх университечĕн физика факультечĕн комсомол пухăвĕнче йышăнса туса хунă. Вăл вăхăтра çак отряд çерем çĕр уçма кайнисем валли çурт-йĕрсем çавăрма тата ытти ĕçсене пурнăçлама активлă хутшăннă. Студентсен отрячĕ йĕркеленсе кайнине 1959 çулхи çуркуннерен пуçласа анлăн уявлаççĕ. Малтанах унта 339 студент пулнă, 1990 çул тĕлне вĕсен йышĕ 14 миллиона яхăн çитнĕ. Раççейре тĕрлĕ пăтăрмахсем пулнă пулин те студентсем йывăрлăхсене парăнман. Тĕслĕхрен, Иркутск, Курган, Челябинск, Свердловск, Красноярск тата ытти облаçсенче вĕсем яланах пулнă, пур та.
30 çул иртсен Раççей студенчĕсен отрядĕнче пулнисем тĕл пулни калама çук пысăк савăнăç пулчĕ. Халĕ вĕсем пурте яваплă вырăнта ĕçлеççĕ. Слета 6 пин çын ытла - Совет Союзĕ вăхăтĕнчи пĕтĕм Союзла республикăсенчен - пур ăру çыннисем те пухăннă. Вĕсене пурне те студентсен отрячĕсем пĕрлештерсе тăнă.
Слет чаплă лару-тăрура Мускав патшалăх университечĕн физика факультечĕ умĕнче уçăлчĕ. Унăн программи çав тери туллин пулчĕ: тĕрлĕрен савăнăçлă каçсем, çавра сĕтел, конкурссем. Тĕслĕхрен, Раççейри студентсен ĕçĕ-хĕлĕ пирки хатĕрленĕ видеосюжетсен конкурсĕнче Чăваш Енри «Жара» педагогика отрячĕн видеоклипĕ 1-мĕш вырăн йышăннă. «Студентсен педагогика отрячĕсем» «çавра сĕтеле» Чăваш Ен представителĕсем хатĕрлесе ертсе пычĕç. Çакă, паллах, ахальтен мар: пирĕн республика Раççейри педагогика отрячĕсене аталантарас енĕпе тĕрев площадки шутланать. «Çавра сĕтел» ĕçне 67 регионран 150 ытла çын хутшăннă. «Раççей студентсен отрячĕсем» пĕрлешĕвĕн Чăваш Енри уйрăмĕн ертÿçисене Ю.Алановапа Е.Наумована РФ Спорт, туризм тата çамрăксен политикин министерствин Тав хучĕпе чысланă. Çак уйрăмăн комиссарне В. Сергеевана, «Лето нон стоп» тата «Звездный» педагогика отрячĕсен командирĕсене Н.Казаковапа Д.Ефимова юхăмăн Хисеп паллипе наградăланă. Чăннипех те ку уяв пысăк пĕлтерĕшлĕ пулчĕ. Раççее ертсе пыракансенчен те чылайăшĕ хăйсен ĕç биографине студентсен отрядĕнчен пуçланă. Вĕсем те савăнăçлă-лару тăрăва хутшăнчĕç. Манăн та çак слета хутшăнма тÿр килнишĕн чунтанах савăнатăп.